ل نەورۆزا ئەڤ سالە دێ كلیپەكێ بەلاڤ كەم
زنار تۆڤی:
مۆزیكژەن (رۆژینا وەحیدپۆر) كوخەلكا باژێرێ سنەیە ل رۆژهەلاتێ كوردستانێ، د دیدارەكێ دا بۆ رۆژناما ئەڤرۆ گۆت: ئەڤە بیست سالن ئەز ئامیرێ دەفێ دژەنم و سالەكە من گرۆپێ (كچێن سنە) دامەزراندیە، ژبلی دەفێ ئەز ئامیرێن دۆل و تێمپۆ و داربوكە دژەنم، لێ پتر حەزژ ژەنینا ئامیرێ دەفێ دكەم.
ناڤهاتیێ گۆت: ل رۆژهەلاتێ كوردستانێ هێشتا ئاستەنگ ل پێشیا ژنان هەنە، بەلێ مە هزر د هندێ دا كر كو بەردەوامیا مە دڤی كاری دا سەركەڤتنا مەیە، هەروەسا ئەم ل سەر هێمایێن كوردی كاردكەین و گرنگیێ ب كلتۆر و هونەرێ كوردی ددەین، هەروەسا بزاڤێ دكەین ب رێیا هونەری، هەم ژنێن كورد هەم ژی هونەرێ كوردی بۆ خەلكێ جیهانێ بدەینە نیاسین، بۆ زانین ئەز سەرپەرشتیا گرۆپێ (مۆزیكێ یێ كچان) كچێن رۆژهەلاتێ كوردستانێ دكەم، ئەڤ گرۆپە گەلەك یێ سەركەفتی یە و هەموو ژی دەرچوویێن ئەكادیمیێن هونەری ل رۆژهەلاتێ كوردستانێ، د پلانا مەدایە كلیپەكێ بۆ جەژنا نەورۆزا ئەڤ سالە بەلاڤ بكەین، هەروەسا د پلانا مە دایە ل دهۆك و هەولێر و سلێمانیێ ژی كۆنسێرتان بگێرین.
