ل هنداڤــا گـۆڕێ بـرای
رەمـەزان ئیســماعیل
سەردار.. برا..!! دهێتە گۆتن: بەری پتر ژ پێنجی سالا ئەز و تو ل ئەڤی گوندێ ب دار و بار، هەمی دەحل و كورسی و تڕاش، ب چەلەختە و هەلەمویت وتەڤ كەڤر و كاش، ب كولۆخ و تەڤ بەرۆك و بەتەن و بویش، یێ ب كۆز و پاوان و پویش، دگەل خویشكەكا مینا نافكا نێرگزێ خودێ مەزن ئەز و تو داین و ئیناینە سەر ڕویێ ئەردی، هێشتا ژیێ مە نەگەهشتی شەش حەفت سالیێ، ڕازیبوون ب قەدەرا وی، خودایێ مە جانێ هەردو دەیبابێت مە بەر ب كنارێ دلۆڤانیا خوەڤە برن، هەردو مرن ژمە دویركرن ، هێشتا ژیێ خویشكا مەیا جانەمەرگ ژی نەبوی دەه سال، خودایێ مە ئەوژی ژمن و تە دویر ئێخست، ژ من و تە جوداكر و ئەمانەتێ خوە ژ وێ ژی ستاند، وێ ژی ژ جیهانێ باركر و خوە ژ ناڤ مە هەمیا هلاند، ئەز و تۆ ماین بێ ڕێ و كۆلان، بێ خودان وسەر و سەمیان، مینا پەزەكێ بێ شڤان، میناكەسێن دەر ب دەر بووین، سەرێن ڕێكا هەمیا پێكڤە لێ بەرزە بووین، خوارنامە دانەك ل ڤێرێ و ئێك ل وێراهە پاریەك نانی ل ڤێ مالێ و ئێك ل مالا دی و ل بن ڤێ سیڤاندێ و ئێكا دی و ب ژار و ژویری و ب فەقیری، ڕۆژەكێ تێر دووا برسی، ب نان و ئاڤێ یان ژی ب تورسی، ل ڤێ كۆلانێ و كۆلانا دی و ب خواستنێ ل دەرێ مالا ب زكێ ڤالا، جار سەركۆل و ڕویس و پێخاس، ژ موعیزی و ژ بێ حالی، تیقەلێن مە ئاخ دمالی، بڤی ئاوایی و بێ خواندنگەه، بێ زانین و بێ زانینگەه، مە ڕۆژێن خوە دبۆراندن، هەتا بووینە نەه و دەه و یازدە سالی ژ بێ داهاتی و ژ نەچاری و ژبێ كاری، مە گوپالێن خوە هەلگرتن و بووین شڤانێن بەرخ كارا ل ڤان بەڕۆژ و نزارا ، پاشی شڤانێن گوندی خوە یێت ئێك ملكی و بوینە هەڤال بو نهال و شكەفت وچیا بۆ لات و گر و گەلییا، بێ شویشتن وبێ ڤەشویشتن، نە وەك هەڤال و هۆگرا، بێ دەركەڤتن جار جار د گەل دەستەبرا بەس جارەكێ دگەلێك چووباین سەیرانەكێ ..گەڕیانەكێ ..كەیف و شاهی.. و دیلانەكێ یان ڕوینشتباین دیوانەكێ ، چەند موی ب سەرێن من ڤە هەنە مەهێش پتر تەحلی دیتن، ژبەر ئاستەگ و نە خۆشییا مەنەدزانی كا ژیێ مە چەوا دچیتن، گەلەك ژێهەلی و ژۆردانی مە هەردوكا دەرباز كرن، گەلەگ ڕۆژێن ب زەحمەتی ئاڤاكرن، گەلەك شەڤا بێ خوارن و بێ ڤەخوارن، بێ نڤین و بێ نخاڤتن ئەم نڤستین، بەلێ پشتی ئەم ژی بووینە دو زەلامێن هلكێشای و یێن گر و گشت، خودان خێزان و مال و تشت، مە باش خوە ل سەر ئەردی گرتی و هەر دو پێن خوە ڕوكوماندین مە نەخوەشیێن بەری هینگێ ژبیركرن و ل شوینا وان هەمی بوونە كەیف و گڕنژین و كەنی، پشتی هینگێ ب ئێكجاری مە های ژ دەردەسەریا نەما، مە ڤڕڤڕاند بارێ خەما، ژین و ژیارا من و تە بەر ب ئاقارەكێ خوەشتر كەڤتە ڕێكێ، خوەشی بوو ئەو یا ئەز و تۆ كەڤتین تێدا، بەلكو ئەز و تو دو كەس بووین، لێ دلێن مە هەردەم ئێكبوون، بشەڤ و ڕۆژا دپێگڤە و دگەلێك، مە هند هیێ خوە دابوو ئێك، خۆلەكەكێ مە بێی ئێك و دو نە د قەتاند، ب دلسۆزی و دلۆڤانی و خوەشتڤیاتی مە دەمێ خوە هەمی دبۆراند، مە هەر دوكا گەلەك گەلەك هەست ب خۆشیێ و خنێ بوونێ و تەناهیێ كر، بەلێ پشتی تە خاترا خوە ژمن خواستی بۆ هەر وهەر، ژمن بووی ڤەدەر، من هەست پێكر، ل ڤێ دنێ مامە بتنێ، جاركا دی تەڤ تەحلییا و نەخوەشییا، سەرو ژنویكا ل من هەودا.
