ل هەرێمێ سێ ملیۆن دۆنەمێن ئەردی بۆ بەرهەمێن زڤستانێ دهێنە بكارئینان
بریكارێ وەزارەتا چاندن و ژێدەرێن ئاڤێ ل حوكمەتا هەرێما كوردستانێ دیار كر، ل ئیراقێ 11 ملیۆن دۆنەمێن ئەردی بۆ چاندنا بەرهەمێن زڤستانێ دهێنە بكارئینان، ل هەرێما كوردستانێ ژی سێ ملیۆن دۆنەمێن ئەردی بۆ چاندنا بەرهەمێن زڤستانێ دهێنە بكارئینان، پار جۆتیارێن هەرێما كوردستانێ دو ملیۆن و 500 هزار دۆنەمێن ئەردی كربوونە گەنم.
كەریم سلێمان، زێدەتر بۆ رۆژناما ئەڤرۆ گۆت: «ل دووڤ پێشبینیان ئەڤ سالە دێ یا باش بیت بۆ چاندنێ و رێژەكا باش یا بارانان ژی دێ بارن و نوكە جۆتیار یێ بەرهەڤیان بۆ وەرزێ چاندنا بەرهەمێن زڤستانێ دكەن، ئەو بەرهەمێ دهێتە چاندن ژی پتریا وی بەرهەمی گەنمە».
ناڤهاتی گۆتژی: «حوكمەتا ئیراقێ دیار كریە، كو ئەڤ سالە 11 ملیۆن دۆنەمێن ئەردی بۆ بەرهەمێن زڤستانێ دێ هێنە بكارئینان ب هەموو جۆرێن خوەڤە و پتر دێ بەرهەمێ گەنمی هێتە چاندن و ل هەرێما كوردستانێ ژی سێ ملیۆن دۆنەمێن ئەردی بۆ بەرهەمێن زڤستانێ و گەنمی دێ هێنە بكارئینان و ئەڤ سالە وەرگرتنا بەرهەمێ گەنمی دێ ل سەر بنەمایێ تۆمارا جۆتیاران بیت و ئەو جۆتیارێن ناڤێن خوە تۆمار نەكەن ژ پرۆسا وەرگرتنا گەنمی ل سالا بهێت دێ بێ بەهر بن».
