ل هەر دۆنەمەكا ئەردی 250 كیلۆیێن كونجیان بەرهەم دهێن
ئامێدیێ، مەحمود نهێلی
ل هژمارەكا چەمێن سەر ب ناوچەداریا دێرەلۆك دەست ب هەلكۆلانا كونجیان هاتە كرن و ل دووڤ گۆتنا بەرپرسەكی چاندنێ ل دێرەلۆكێ، ئەڤ سالە پتر 800 دونەمێن ئەردی بۆ مەبەستا چاندنا كونجیان هاتینە ب كارئینان و داهاتەكێ باش بۆ جوتیاری بەرهەم ئینایە و جوتیار ژی دبێژن: بەرهەمێ كونجیان ئەڤ سالە وەكو سالا چوویی د باش نینن.
عارف رمەزان ئێك ژ جوتیارێن دەڤەرێ دبێژیت: هەموو سالان ئەز ب كارێ چاندنا كونجیان رادبم و گۆت: كونجیا دەڤەرا مە هەموو سالان یا باشە لێ ئەڤ سالە وەك سالێن چوویی نینە و گۆت: ل دەڤەرا مە گەلەك جورێ، كونجیان دهێنە چاندن، لێ كونجیا هەری سەركەفتی یا كوردیە و ئەوا بەرێ دا دهاتە چاندن.
ناڤهاتی دیار كر، ئەو كونجیێن دادقوتن دبەنە سیكێ هەم بو فروتنێ هندەك جوتیار ژی ب تنێ كونجیا بۆ خوە دچینن و دكەنە تەحین و گۆت: هێشتا ئەڤ سالە بهایێ وێ نەهاتیە دیاكرن، بەلێ ل سالێن بووری كێلویا كونجیێ دناڤبەرا 6 بۆ 8 هزار دیناران دا بوویە و گۆت: زێدەباری وێ یەكێ ئاڤ یا كێم بوویە، ئەڤ سەقایێ دنیایێ گەلەك گەرم بوویە و چێدبیت ب وێ ئەگەرێ كارتێكرن ل كونجیێ هاتیە بیتە كرن و باش چێ نە ببیت.
جوتیارەكی دی ب ناڤێ فایق شەعبان بۆ رۆژناما ئەڤرۆ دیاركر، دنوكە دا هاریكاریا جوتیاری ناهێتە كرن بۆ وێ یەكێ دەمێ جوتیار دەست ب كارێ چاندنێ دكەت، زیان نەگەهنێ وەك دابینكرنا كیمیایێ و هەروەسا گازویلێ و چێكرنا جویێن ئاڤدانێ و گۆت: كونجیا ئەڤ سالە گەلەك یا باش نەبوویە وەكو سالێن چوویی.
ئەندازیار عسمەت ئیبراهیم بەرپرسێ هۆبا چاندنێ ل دێرەلۆكی بۆ رۆژناما ئەڤرۆ خویاكر، ل سنورێ هوبا وانا چاندنا كونجیان سال بۆ سالێ پتر لێ دهێت، ژ بەر كو بەرهەمێ وێ یێ باشە و تاما وێ ژی یا خوەشە و گۆت: ئەڤ سالە خۆشبەختانە دورێن 800 دونەمێن كونجیان هاتبوونە كرن.
ل گور وان زانیاری و داتایێن تەخمینی یێن ب دەست مە كەفتین جهێ هەر دونەمەكا ئەردی دورێن 250 كیلویێن كونجیان لێ بەرهەم دهێن و هەر كیلویەكا كونجیان ب تایبەتی یێن دەڤەرێ پتر ژ پێنج هزار دیناران دهێتە فروتن، ب ڤێ یەكێ یەكی ژی بهایێ داهاتی هەر دوونەمەكا ئەردی دبیتە ئێك ملیون و دوو سەد هزار دینار و بهایێ كونجیێن 800 دونەمێن ئەردی دگەهتە نێزیكی ئێك ملیار دیناران.
