ل هەر چار پارێزگەهێن هەرێمێ فۆرمێن ئاهێن خوارنێ دێ بنە ئەلكترۆنی
هەولێر، قائید میرۆ:
بەرپرسەكێ وەزارەتا بازرگانی و پیشەسازی خویاكر، هەرێما كوردستانێ داخوازكریە ل هەر چار پارێزگەهان فۆرمێن ئاهێن خوارنێ ببنە ئەلكترۆنی و دبێژیت: ئەم پشتڕاستین دێ پرۆسە هەر هێتە دەستپێكرن و فۆرمێن نوكە نامینن.
حسێن سەبری، نوونەرێ بازرگانیا هەرێمێ ل بەغدا بۆ رۆژناما ئەڤرۆ دیاركر، بڕیارا ئەلكترۆنیكرنا فۆرمێن ئاهێن خوارنێ هاتیەدان و دێ چیتە د بیاڤێ بجهئینانێ دا، بەلێ بازرگانیا ئیراقێ دخوازیت ل دەستپێكێ ل ئێك ژ پارێزگەهێن هەرێما كوردستانێ سیستەم ببیتە ئەلكترۆنی و گۆت: «د كۆمبوونا بۆری دا مە داخوازكریە ل هەر چار پارێزگەهێن هەرێما كوردستانێ پێكڤە پرۆسا ب ئەلكترۆنیكرنا فۆرمێن ئاهێن خوارنێ بڕێڤە بچیت».
حسێن سەبری گۆتژی: «حوكمەتا ئیراقێ بەهانە هەنە و یا بەرهەڤ نینە ل هەر چار پارێزگەهێن هەرێما كوردستانێ پێكڤە بهێتە دەستپێكرن، بەلێ بازرگانیا هەرێمێ یا رژدە ل سەر ڤێ چەندێ، ئەگەر فۆرم ببنە ئەلكترۆنی، ب تنێ ل ئێك پارێزگەهێ نەبیت، نوكە ئەم یێ چاڤەڕێی بەرسیڤا بەغدا و ئەم پشتڕاستین دێ پرۆسە هەر هێتە ئەنجامدان».
