ل هەموو دەڤەرداریان دەڤەرێن پیشەسازی دێ هێنە ڤەكرن
هەولێر، قائید میرۆ:
بەرپرسەكێ دەستەیا گشتیا وەبەرهێنانێ ئاماژەكر، ل هەموو دەڤەرداریان دەڤەرێن پیشەسازی دێ هێنە ڤەكرن و دبێژیت: ڤەكرنا دەڤەرێن پیشەسازی كاریگەری ل سەر پەیداکرنا دەلیڤێن كاری و ب بازاركرنا بەرهەمێ ناڤخوە هەیە.
دكتۆر هەڤال سەدیق، رێڤەبەرێ گشتیێ مۆهلەتدانێ ل دەستەیا وەبەرهێنانێ بۆ رۆژناما ئەڤرۆ دیار كر، بڕیار هاتیەدان ژبلی پارێزگە و ئیدارەیێن سەربخوە دەڤەرێن پیشەسازی ل دەڤەرداریان ژی بهێنە ڤەكرن، چونكی حوكمەت گرنگیەكا زۆر ب كەرتێ پیشەسازی ددەت و گۆت: «بڕیار هاتیەدان دەڤەرێن پیشەسازی ل دەڤەرداریێن ئاكرێ و بەردەڕەش ژی بهێنە ڤەكرن، ل هەولێرێ ژی دەڤەرا پیشەسازی هاتیە چێكرن، ل ئیدارا سەربخوە یا زاخۆ ژی بەر ب تەمامبوونێ یە و ل پارێزگەها دهۆكێ ژی تەمامبوویە، ل دەڤەرێن دی ژی دێ ب هەمان شێوە دەڤەرێن پیشەسازی هەبن».
دكتۆر هەڤال سەدیق گۆتژی: «ل سەر دەمێ كابینا نەهێ گرنگیەكا زۆر ب كەرتێ پیشەسازی هاتیەدان و هەتا نوكە مۆهلەت ب 290 پڕۆژەیێن پیشەسازی هاتیەدان، مەرەم ژ دانانا دەڤەرێن پیشەسازی ئەڤەیە دەلیڤێن كاری بۆ وەلاتیان پەیدا ببن و بازاڕ بۆ بەرهەمێ ناڤخوە پەیدا ببیت، ژ بەركو كارگەهێن جوراوجۆر ل دەڤەرێن پیشەسازی دێ هێنە دامەزراندن و كارتێكرن ل سەر بەرهەمێ ناڤخوە هەبیت».
