ل هەیڤا 9 دێ دوماهی ب سیسته‌مێ پاشەکەفتا مووچەی هێت
ئەڤرۆ نیۆز،زنار تۆڤی:
به‌رپرسەکێ بلند یێ حوکمه‌تا هه‌رێما كوردستانێ دیاردکەت،کو ئەو هه‌ولدده‌ن ل هەیڤا (9) یا ئه‌ڤ سالەدا له سه‌ر بنه‌مایێ لیستا بایۆمه‌تری مووچەی بدەنە مووچه‌خۆر و فه‌رمانبه‌رێن حوکمەتێ.
قۆباد تالەبانی جێگرێ سه‌رۆكێ حوکمه‌تا هه‌رێما كوردستانێ،ئێڤاریا (ئێکشەمبیێ 2/ 7/ 2017) ل پارێزگەها هه‌ڵه‌بجه بۆ ڕۆژنامه‌ڤانان راگەهاندیە : ئەم یێ كار دكه‌ین بۆ دارشتنا سیسته‌مەکێ نوو یێ مووچه‌ی و مە دڤێت ل سه‌ر بنه‌مایه‌كێ زانستی سیسته‌مێ مووچه‌ی دابمه‌زرێنین،کو یێ گونجای بیت و ل ئاستێ شیانێن مە دابیت بۆ جێبەجێکرنێ.
قوباد هێشتا دبێژیت، ئه‌ڤ سیسته‌مە یێ گرێدایە ب ته‌مامكرنا پڕۆسا بایۆمه‌تری ڤە،کو هەتاکو نوکە به‌شەکێ زۆر یێ پرۆسا بایۆمه‌تری یێ تەمامبوویە، گوت ژی:نوکە د قۆناغا هووربینیێ داینە و دێ هەولدەین ل هەیڤا (9) یا ئەڤ سالە له سه‌ر بنه‌مایێ لیستا بایۆمه‌تری یێ مووچەی بدەینە مووچه‌خۆر و فه‌رمانبه‌رێن حوکمه‌تێ.
گۆت ژی،ژ نەچاری مە بریارا پاشه‌كه‌فتا مووچه‌ی دایە، ئه‌ڤەژی بڕیارەکا نەخۆش بوو،لەورا مەنەڤێت بریارەکا ب لەز بده‌ین و خەلەتی و کێم و كورتی تێدا هەبیت، به‌لكو مە دڤێت ل سه‌ر بنه‌مایه‌كێ زانستی سیسته‌مێ مووچه‌ی یێ نوو دابرێژین هه‌تاکو دوماهیێ ب سیسته‌مێ پاشه‌كەفتێ بینین.
