ل وەلاتێ (نەرویج) كوردەك بەربژارە بۆ وەرگرتنا خەلاتێ باشترین ئەكتەر
زنار تۆڤی:
هەمزە ئاگۆشی، كو خەلكێ رۆژهەلاتێ كوردستانێ یە و بۆ دەمێ چەندین سالان كارێ سیاسی و پێشمەرگایەتی و رۆژنامەڤانی كریە و چەندین سالان ل هەرێما كوردستانێ ژیایە، د دیدارەكێ دا بۆ رۆژناما ئەڤرۆ گۆت: دژیەكێ بچووكدا من حەز ل سەر كارێ هونەری هەبوو، نوكە كارێ نڤێسینێ دكەم و ئەز تێكەلی مۆزیكێ و كارێ شانۆیێ بوویمە، ل سالا 1993 ێ، من كارێ رۆژنامەڤانیێ كریە ل هەرێما كوردستانێ، هەروەسا ل گەلەك رۆژنامێن كوردی یێن هەرێما كوردستانێ من كاركریە، نوكە ژی ل تەلەڤزیۆنێ كاردكەم ل نەرویج، من چەندین كارێن شانۆیێ ل هەولێرێ ئەنجامداینە، ل سالا 2011 ێ، هاتیمە وەلاتێ نەرویج و ل سالا 2014 ێ، من دەست ب كارێ هونەری كریە ل نەرویج و هەتا نوكە من پشكداری د چەندین كارێن درامایی دا كریە، دیسا من پشكداری د كورتە فلمەكی دا كربوو ب ناڤێ (شوانەكە) ژ دەرهێنانا بروا وەهابپوور بوویە، وی كورتە فلمی ل فلمە فەستیڤالا دهۆكێ خەلاتێ بەلگێ زێڕی ب دەستڤە ئینایە، دو جاران بۆ وەرگرتنا مەزنترین خەلات ل وەلاتێ نەرویج هاتیمە بەربژاركرن.
ناڤهاتی گۆت: خەلاتێ (ئاماندا) كو مەزنترین خەلاتێ سینەمایی یە ل وەلاتێ نەرویج و سالانە ئەو خەلاتە بۆ دەرهێنەر، وێنەگر، پرۆدیوسەر و دیزاینەران و ئەكتەران دهێتە پێشكێشكرن، ئەو خەلاتە پەیكەرێ ژنەكێ یە كو هێمایەكە بۆ بلنداهییا هونەرێ وەلاتێ نەرویج، هەروەسا فلمێ سینەمایی(مام یونس) كو ژ دەرهێنانا بروا وەهاب پوورە، كارێ ئەكتەریێ من و پەیمان عەزیزپوور و كۆمەكا هونەرمەندێن كورد و نەرویجی تێدا كریە ل نەرویج و بۆ جارا ئێكێ ئەو فلمە ل تێكساس ل وەلاتێ ئەمریكا هاتیە نیشادان، ئەو فلمە ئێك ژ وان فلمانە كو ل فەستیڤالا نێڤدەولەتییا فلمێن (میۆنشن) ل ئەلمانیا یێ پشكدارە و ل گەل فلمێن جیهانی دێ هەڤڕكیێ ل سەر ب دەستڤەئینانا خەلاتان كەت.
