ل پارێزگەھا دھۆکێ نێزیکی ٩٠٠ ھزار دۆنەمێن دەخل و دانی ھاتینە چاندن
دھۆک، لەزگین جوقی:
پەیڤدارێ رێڤەبەریا گشتی یا چاندنی ل پارێزگەھا دھۆکێ دیار کر، ژبەر گیرۆبوونا بارانبارینێ مەترسی ل سەر بەرھەمێ دەخل و دانێ جۆتیاران ھەیە کو ئەڤ سالە ل دھۆکێ ٨٩٠ ھزار دۆنەمێن دەخل و دانی ھاتینە چاندن.
فەرھاد محەمەد، پەیڤدارێ رێڤەبەریا گشتی یا چاندنێ ل پارێزگەھا دھۆکێ بۆ رۆژناما ئەڤرۆ راگەھاند، ل پارێزگەھا دھۆکێ ٨٩٠ ھزار دۆنەمێن دەخل و دانی ھاتینە چاندن، ژ وانا ژی ٨٠٠ ھزار دۆنەم دێمی نە و ٩٠ ھزار دۆنەم ژی ل بەر ئاڤێ ھاتینە چاندن و گۆت: “ئەڤ سالە ھەر ژ دەستپێکا وەرزێ بارانبارینێ ھەتا رۆژا ١٤/٢/٢٠٢١ێ ل دھۆکێ ٢٨٢ ملیمێن بارانی بارینە و سالا بۆری ھەتا ڤی دەمی ٣٧٢ ملیمێن بارانی ھاتبوون، ھەکە باران د دەمێ خوە دا ب شێوەکێ بەردەوام نەھێن کارتێکرن ل سەر بەرھەمێ دەخل و دانی دھێتە کرن”.
ئاشکرا ژی کر، ئەو دەخل و دانێ دھێتە چاندن بەردەوام پیدڤی بارانان ھەیە، داکو بەرھەمێ وێ باش بیت و دەمێ باران گیرۆبن کارتێکرن ل سەر بەرھەمێ دەخل و دانێ دھێتە کرن.
