ل پارێزگەھا دھۆکێ 7 ھەڤژین سەرا کۆچبەریێ ژێکڤە بووینە
ئه‌ڤرۆ نيوز:
د ھەیاما 10 ھەیڤێن بۆری یێن ئەڤ سالە دا ل سنوورێ پارێزگەھا دھۆکێ 983 حالەتێن ژێک جودابوونا ژن و مێران دروست بووینە و د بەرامبەر دا 10475 مارەبڕین ژی ھاتینە کرن، سکرتێرێ سەندیکا پارێزەران دیار دکەت کو ئەڤێ یەکێ ژی ئەگەرێن جودا جودا ھەبووینە.
ل گۆر ئامارێن سەرۆکاتیا دادگەھا تێھەلچوونا دھۆکێ کو ب دەست رۆژناما ئەڤرۆ کەفتینە د ھەیاما 10 ھەیڤێن بۆری یێن ئەڤ سالە دا 973 حالەتێن ژێک جودابوونا ژن و مێران ل سنوورێ پارێزگەھا دھۆکێ چێ بووینە، ژ وان وان ژی 826 حالەتێن ژ جۆرێ بارێ کەسایەتی، ئانکو موسلمانن و 157 حالەت ژی ژ جۆرێ کاروبارێن کەسایەتی (مادەکانن) ئانکو ئێزدی و مەسیحی نە.
ئەڤە و ل دەمەکی د سالا بۆری دا ب گشتی 1178 حالەتێن ژێک جودابوونێ ھەبوون، ژ وان ژی 1103 حالەت ژ جۆرێ بارێ کەسایەتی بوون و 75حالەت ژی ژ جورێ کاروبارێن کەسایەتی بوون.
د ئامارا سەرۆکاتیا دادگەھا تێھەلچوونا دھۆک دا ھاتیە کو د ھەیاما 10 ھەیڤێن بۆری دا 10475 حالەتێن ھەڤژینیێ دروست بووینە، کو ژ وان 8437 ھەڤژینیێن ژ موسلمانن و 2038 حالەت ژی ئێزدی و مەسیحی نە، ھندەک ژ وان ھەڤژینیێن کو ھاتینە تۆمارکرن ل دادگەھێن سەر ب سەرۆکاتیا دادگەھا تێھەلچوونا ناوچا دھۆکێ ژ دەرڤەیێ دادگەھێ بووینە و ل وی دەمی دیار بووینە کو وان خێزانان دڤیا ناڤێن زارۆیێن خوە تۆمار بکەن، د بەرامبەر دا سالا بۆری 15011 مارەبڕین ھاتینە ئەنجامدان و ژ وان ژی 12181 موسلمانن و 2830 ئێزدی و مەسیحی بووینە.
ھەر ل گۆر ئامارا سەرۆکاتیا دادگەھا تێھەلچوونا ناوچا دھۆک حەفت حالەتێن ژێکجودابوونا ژن و مێران پشتی دەرکەفتنا کۆچکرنا گەنجان د ھەیاما سێ ھەیڤێن بۆری دا ل سنوورێ پارێزگەھا دھۆکێ دروست بووینە.
ل دۆر ئەگەرێن ژێک جودابوونا ژن و مێران پارێزەر دلێر بەکر دۆسکی سکرتێرێ سەندیکا پارێزەرێن کوردستانێ لقێ دھۆک دیار کر کو بەھرا پتریا وان ئەگەرێن کو ل سنوورێ پارێزگەھا دھۆکێ بووینە سەدەما ژێکڤەبوونا ژن و مێران، ئەگەرێن دارایی و ئابووری، جڤاکی، تێکنەگەھشتنا د ناڤبەرا ژن و مێران دا، لەزاتی د شووکرن و ژنئینان دا، تەکنەلۆژیا و درامایێن تەلەڤزیۆنی بوونە.
پارێزەر دلێر بەکر دۆسکی و گۆت “ھندەک ئەگەرێن دن ھەبووینە کو ئەو ژی ھەڤژینان ژلایێ مادی ڤە شیانێن پێکئینانا پرۆسا ھەڤژینیێ نینن و ھندەک ژی زۆر بلەزن د ھەڤژینیێ دا بێی کو دووڤچوونەکێ ل سەر ھەڤدوو بکەن و دیسان ژی جوداھیا بارێ خێزانی و ئاستێ خواندنێ و رەوشەنبیری و جوداھیا ژیێ ھەڤژینان ژی ئەگەرێن دنن”.
سکرتێرێ سەندیکا پارێزەران دیار کر ژی کو ل ڤێ دووماھیێ ئەگەرەکێ دن یێ ژێک جودابوونێ پەیدا بوویە، چوونا ژدەرڤەی وەلاتی، چونکی زەلام ب ھەر ئەگەرەکێ ھەبیت دێ قەستا دەرڤەکەت و د دووڤ دا ھەڤژینا وی دخوازیت بھێتە بەردان و گۆت “ئەم دخوازین کو ھەردو ھەڤژین ب تایبەتی زەلام بێنفرەھیێ بکێشیت و نەچیتە ژ دەرڤە، چونکی ئەڤ بارودوخێ نھا کوردستان تێدا د بۆریت بارودوخەکێ گشتی یە و ب سەر ھەموو کوردستانێ دا ھاتیە، لەورا نابیت ببیتە سەدەما ژێکجودابوونا ھەڤژینان”.
ل دوماھیێ پارێزەر دلێر بەکر دۆسکی گۆت “نھا تەکنەلۆژیا بەر ب گھۆرینێن مەزن ڤە دچیت و ئەڤ یەکە ژی بوویە سەدەم گەلەک ژ ژن و مێران ب شاشی بکاربینن ب تایبەتی تۆرێن جڤاکی، چونکی مژوولبوون و بکارئینانا وێ ھەڤژین ژێک دوور کرینە پویتەی ب پەیوەندی و کەسایەتی و خێزانێ ب گشتی نادەن، ئەڤجا ژێکجودابوون د ناڤبەرا وان دا دروست دبیت”.
