ل پەرلەمانێ ئۆرۆپا دێ بەحسێ رەوشا کوردان هێتە کرن
پەرلەمانێ ئۆرۆپا دێ کۆمبوونەکا تایبەت ل دۆر پرسا کوردی و پێشهاتەیێن ل دەڤەرێ ساز کەت و تێدا دێ بەحسێ رەوشا کوردێن رۆژئاڤایێ کوردستانێ هێتە کرن و بەرپرسا پەیوەندیێن دەرڤە یا رێڤەبەریا خوەسەر ژی دێ د کۆمبوونێ دا گۆتارەکێ پێشکێش کەت.
ئەڤین ئینجیر ئەنداما پەرلەمانێ ئۆرۆپا دیار کر، ل سەر داخوازا وێ و چەند ئەندامێن دی یێن پەرلەمانی بریار هاتە دان رۆژا ٢٥ ڤێ مەهێ کۆمبوونەکا تایبەت ل دۆر رەوشا کوردان ل سووریێ و پێشهاتەیێن دەڤەرێ بهێتە ساز کرن و د کۆمبوونێ دا دێ بەحسێ رەوشا کوردان ل سووریێ هێتە کرن و ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر ژی دێ پشکدار بیت و دێ گۆتارەکێ پێشکێش کەت و هەروەسا رۆهەلات عەفرین فەرماندارا هێزێن پاراستنا ژنان یا رۆژئاڤایێ کوردستانێ ژی دێ پشکدار بیت.
ناڤهاتیێ ئەو یەک ژ دیار کر، د پشکەکا دی یا کۆمبوونێ دا دێ بەحسێ قووناغا ئاشتیێ ل تورکیا ژی هێتە کرن و ژ بۆ ڤێ یەکێ ژی میتحات سانجار ئەندامێ شاندێ ئیمرالیێ دێ گۆتارەکێ پێشکێش کەت و گۆت: (بێگومان نها گوهۆڕینێن بلەز ل رۆژهەلاتا ناڤین روو ددەن و هەروەسا ل سووریێ ژی هێشتا مەترسی ل سەر کوردان هەنە، ژ بەر ڤێ یەکێ ژی وەکو پەرلەمانێ ئۆرۆپا مە دڤێت دەنگێ کوردان بگەهیننە هەموو جیهانێ و بێگومان کۆمبوونێن وەسا نها گەلەک گرنگن و مە دڤێت هەموو وەلاتێن ئێکەتیا ئۆرۆپا پشتەڤانیێ ل مافێن کوردان ل سووریێ بکەن).
ئەنداما پەرلەمانێ ئۆرۆپا ئەو یەک ژی دیار کر، قووناغا ئاشتیێ یا ل تورکیا گەلەک گرنگە، بەری نها پەرلەمانێ ئۆرۆپا ب فەرمی پشتەڤانیا خوە بۆ قووناغا ئاشتیێ و چارەسەرکرنا پرسا کوردی ل تورکیا دیار کربوو، لێ مخابن هەتا نها ب کریاری ژ ئالیێ دەولەتا تورکیا ڤە چو نەهاتیە کرن، مە دڤێت دەولەتا تورکیا هندەک پێنگاڤا بهاڤێژیت، هەتا نها دەمیرتاش و هەڤالێن وی نەهاتینە ئازاد کرن، هەروەسا ئاستەنگی ل هەمبەر پەروەردەیا ب زمانێ کوردی ل تورکیا هەنە و دەست ب چاکسازیێن سیاسی و قانوونی ژی ل تورکیا نەهاتینە کرن و کورد ژ رەوشا نها رازی نینن.
ئەڤین ئینجیر د دووماها ئاخڤتنا خوە دا ئەو یەک ژی نەڤەشارت کو ئێکەتیا ناڤمالیا کوردان گەلەک گرنگە، ڤێ دووماهیێ گوهۆڕینێن باش روو دان، کورد ل هەمبەر روودانێن ل سووریێ و رۆژئاڤایێ کوردستانێ ئێک هەلوەست بوون و ئەو یەک ژی گەلەک گرنگە و گۆت: (هەکە هێزێن کوردی یێن هەر چار پارچەیێن کوردستانێ ئێکگرتی بن و پێکڤە کار بکەن دێ هێزێن جیهانی ژی نەچار بن پشتەڤانیێ ل مافێن رەوا یێن گەلێ کوردستانێ بکەن، دڤێت کورد مفایێ ژ گوهۆڕینێن نها ل دەڤەرێ وەربگرن و ببنە هێزەکا کاریگەر).
