ل پەرلەمانێ ئیراقێ ئیمزا بۆ گرانیا بازاڕی هاتینە كۆمكرن
دووڤچوون، قائید میرۆ
پشتی بڕیارا زێدەكرنا باجا گومركی ل بەغدا هاتیە دەركرن، بهایێ زۆربەیا كەلوپەلان بەرەف بلندبوونێ یە. پەرلەمانتارەكێ كورد ل پەرلەمانێ ئیراقێ دبێژیت: راستە بهایێ زۆربەیا كەلوپەلان بەرەف گرانیێ دچیت و گۆت ژی: مە ئیمزا كۆم كرینە و ئەگەر رەوش یا بەردەوامبیت دێ رێكارێن دی هەبن ژلایێ پەرلەمانی دژی گران بوونا بهایێ كەلوپەلان.
شێروان جەمال، پەرلەمانتارێ فراكسیۆنا پارتی ل پەرلەمانێ ئیراقێ بۆ رۆژناما ئەڤرۆ دیار كر «پشتی زێدەكرنا باجا گومركی ژلایێ حوكمەتا ئیراقێ ڤە، ئەندامێن پەرلەمانی ئیمزا كۆمكرن، ژ بۆ هەلوەشاندنا بڕیارا زێدەكرنا باجا گومركی، چونكە یا خۆیایە پشتی ئەڤێ بڕیارا بهایێ كەلوپەلان دناڤا بازاڕێن ئیراق و هەرێما كوردستانێ گران بووینە، مە ژی وەكی پەرلەمانتارێن پارتی و پەرلەمانتارێن كورد ئیمزا كۆم كرینە و پێشكێشی دەستەیا سەرۆكایەتیا پەرلەمانی كرینە، ب تنێ ئەم دژی ئەڤێ زێدەكرنا باجا گومركی نینین، پەرلەمانتارێن هەموو فراكسیۆن و پارێزگەهێن ئیراقێ ژی تێدانە.
زێدەتر گۆت: هەر چەندە سەرۆكایەتیا پەرلەمانی دێ رێكارێن خوە تەمام كەت و ئیمزایان ژی ئاراستەی حوكمەتێ كەت، بەلێ ئەز باوەرناكەم بڕیارا زێدەكرنا باجا گومركی بهێتە هەلوەشاندن، ژبەركو رەوشا دارایی یا ئیراقێ یا ئالۆزە و گەهشتیە ئاستەكی ئیراق نەچاربوویە باجا گومركی زێدە بكەت هەتا بشێت داهاتی كۆم بكەت، لەوڕا باوەرناكەم جارەكا دی باجا گومركی وەك بەرێ بیت و بڕیارا نوو نەهێتە جێ بەجێكرن، بەلێ ئاریشە ئەڤە بارگرانی بۆسەر خەلكێ ئیراقێ و هەرێما كوردستانێ پەیداكریە، چونكە بهایێ زۆربەیا كەلوپەلان گران بوویە یانژی بەرەف بلندبوونێ دچیت، ئەڤە ژی كارەساتە و رەوشا ئابوریا خەلكی هند یا باش نینە ڤێجا بهایێ كەلوپەلان ژی بهێتە گران كرن دێ دوبارە بیتە بارگرانی لسەر وەلاتیان.
شێروان جەمال گۆتژی» دادگەها فیدڕالی برگەهەك رەتكریە یا زێدەكرنا باجێ، مە وەكی پەرلەمان دەستهەلاتێن دارایی ژلایێ قانوونی ڤە نینن، بەلێ ئەگەر بزانین دێ رەوش زێدەتر دژواربیت و وەلاتی نەشێن كەلوپەلێن رۆژانە بكڕن ئەڤە بێگومان ئەم وەكی پەرلەمان نەچارین رێكارێن دی بگرینە بەر، چونكە ئەڤە هەیڤا رەمەزانێ یە و بهایێ كەلوپەلان زۆر گرانتر هەمبەركرن دگەل بەری هاتنا هەیڤا رەمەزانێ، خەلكەكی شیانێن دابین كرنا پێدڤیێن رۆژانە نینە و گازندەیێن زۆر هەنە، ئەم دێ چاڤەڕێی حوكمەتا ئیراقێ بكەین هەتا بەرسیڤا ئیمزایێن مە بدەت یێن هاتینە كۆم كرن، ئەگەر چو پێداچوون نەهاتنەكرن و رەوشا ئابورا وەلاتیان ژی زێدەتر گران بوو ئەڤە نەچارین دێ رێكارێن دی هەبن و رازینابین ب ڤی شێوەی بارگرانی بۆ سەر خەلكی بهێتە چێكرن.
