ل ڤان نێزیكان دێ ئه‌لبۆما خوه یا دویێ به‌لاڤ كه‌ت
ئه‌ڤرۆ، زنار تۆڤی:
هونه‌رمه‌ند باران مێردین، خه‌لكێ باژێرێ مێردینێ یه ل باكورێ كوردستانێ، ئه‌ڤه پتری 20 سالانه د وارێ هونه‌ری دا كار دكه‌ت و سترانان دبێژیت، د دیداره‌كێ دا بۆ رۆژناما ئه‌ڤرۆ دیار كر: ل ده‌ستپێكا كارێ خوه یێ هونه‌ری وی ژ گۆڤه‌ند و ئاهه‌نگان ده‌ستپێكریه، پاشی وی قه‌ستا باژێرێ ئیسته‌نبولێ كر و ئه‌ڤه 10 ساله ل وی باژێری دژیت، ل سالا 2014 وی كلیپا خوه یا ئێكێ به‌لاڤ كریه، هه‌تا نوكه وی شه‌ش كلیپ چێكرینه و وی دووماهی كلیپا خوه ب ناڤێ ” كه‌یفا من ژ ته‌را دهێت”، ل سالا 2019 چێكریه و وی دیمه‌نێن وی كلیپێ ل باژێرێ مێردینێ چێكرینه.
ناڤهاتی ئه‌و ژی گۆت: وی ئه‌لبۆما خوه یا ئێكێ ب ناڤێ ” نه‌سرین” كو ژ 10 تراكان پێك دهات به‌لاڤ كریه، نوكه ژی ئه‌و كار د تۆماركرنا ئه‌لبۆما خوه یا دویێ دا دكه‌ت، هه‌تا نوكه وی 10 ستران تۆمار كرینه و ئه‌لبۆما وی ژ 15 تراكان پێك دهێت و وی لبه‌ره د هه‌یڤا گۆلانێ دا وێ ئه‌لبۆمێ به‌لاڤ بكه‌ت و دیسان وی لبه‌ره سێ سترانان ژ ئه‌لبۆما خوه یا نوو كلیپ بكه‌ت، هه‌روه‌سا د ئه‌لبۆما نوو دا، 10 ستران ژ په‌یڤ و ئاوازێن وی ب خوه‌نه، هه‌ر چه‌نده هه‌تا نوكه وی چو ناڤ نه‌داناینه سه‌ر ئه‌لبۆما خوه.
بارانی ئه‌و ژی ئاشكرا كر: د نوكه دا باشتره مرۆڤ سترانێن سینگل چێكه‌ت و پتر بازارێ سترانێن سینگل هه‌یه، دیسان د نوكه ئه‌م نه‌شێین ئه‌لبۆمێن خوه بفرۆشین و و چو داهات ژی بۆ مه ژێ ناهێت، لێ چێكرنا ئه‌لبۆمێ وه‌كو ناسناڤه‌كێ یه بۆ هونه‌رمه‌ندی، له‌وما ده‌مێ مرۆڤ دبیته سترانبێژ، پێدڤییه ببیته خودان به‌رهه‌م ژی، داكو خه‌لك مرۆڤی ب وی به‌رهه‌می بنیاسن، ژبه‌ر ڤێ چه‌ندێ من ئه‌لبۆما خوه یا دویێ چێكر.
ناڤهاتی ئه‌و چه‌ند ژی گۆت: “د نوكه دا هنده‌ك سترانبێژ ده‌ركه‌فتینه، ب ره‌نگه‌كێ خراب سترانان دبێژن و ئێدی ژبه‌ر وان مرۆڤ شه‌رم دكه‌ت بێژیت ئه‌ز سترانبێژم، چونكی وان زیان گه‌هاندییه ستران و مۆزیكا كوردی، هه‌روه‌سا ئه‌و جۆره سترانبێژه په‌یڤێن سترانان ژی ب ره‌نگه‌كێ خراب دبێژن و ب تنێ خه‌ما وان ئه‌وه كو كلیپان چێكه‌ن و بۆ وان په‌یڤ و مۆزیك دگرنگ نینن، بۆ وان یا گرنگ ئه‌وه خه‌لك بێژنێ ته كلیپه‌كا چێكری، ب چو ره‌نگان ئه‌و كه‌سه خزمه‌تا هونه‌رێ كوردی ناكه‌ن، دیسان هنده‌ك هه‌نه په‌یڤێن توركی و كوردی تێكه‌ل كرینه و ستران گۆتینه، ئه‌ڤه ژی دێ زیانێ گه‌هینیته هونه‌رێ مه یێ كوردی، دڤێت رێك ل به‌ر وان سترانبێژان بهێته گرتن، هه‌روه‌سا نوكه سانسۆر ژی ژ ئالیێ ده‌وله‌تا تورك ڤه ل سه‌ر ستران و موزیكا كوردی هه‌یه، دیسان من لبه‌ره د هاڤینا ئه‌ڤ ساله دا سه‌را كوردستانێ بده‌م و ئه‌ڤه ئێكه ژ حه‌زێن من و من لبه‌ره هنده‌ك كارێن هونه‌ری ژی ل هه‌رێما كوردستانێ ئه‌نجام بده‌م.
