ل ڤێرێ دەم راوەســـتــا !
جەگەر كەمال ڕێكانی
ژیان یا بەردەوامە و وەكی هەر جار ب كەیف و خۆشی دەمێن خۆ بوراندن، دناڤ كەس و كارێن خۆ دا وی هەست ب خۆشیەكا ئێكجار مەزن دكر، وەسا هزر دكر هەما خۆشی ئەوە یا ئەو تێدا، ژبەركو گەلەك یێ ماندیبوو و دڤیا سپێدێ زوی جارەكا دیتر بچیتە سەر كارێ خۆ، گاڤەكێ پشتی دەمێن خۆش دگەل كەس و كارێن خۆ بۆراندی خاترا خۆ ژێ خواست و زڤری شوقەیا خۆ، پشتی دەمەكێ كورت ژ نشكەكێ ڤە چاڤێن وی چوونە سەرئێك و د خەو چوو، چەند دەمژمێر ل سەر خەوا وی نەبۆرین؛ گاڤەكێ هەست ب لڤ لڤینێ كر و دێ بێژی یێ د لاندكەكێ دا و ئێك یێ د هەژینیت، دەنگێن هەواریان ژی گوهێن وی تژیكرن، پەنجەرا ژۆرا وی مابوو ڤەكری و ژبیركربوو بگریت، هەواریەكێ ب هێز پەردەیا ژۆرا وی ژێڤەكر و دگەل خۆ بر، ڤێجارێ ئەڤ شەڤە نە وەكی شەڤێن دیترە، تشتێن سەیر یێن رووددەن، وەكی كەسەكێ سەرمەست ئێكسەر چاڤێن خۆ ڤەكرن و رابووڤە، یێن چاڤێن خۆ د ڤەمالیت و بەرەڤ دەرگەهی دچیت دا بزانیت كا ئەو چییە رووددەت و چ هەوارینە ل ڤی دەمی بێهنا گوهێن وی نادەن، دەرگەهـ ڤەكر دیت هەر كەسەك یێ بۆ لایەكێ دچیت و د شەپرزەنە و دەنگێ هەواریێن وان هەمی قولاچێن ئاڤاهی یێن تژیكری، جارەكا دیتر دەست ب ڤەمالینا چاڤێن خۆ كرە ڤە، دا بزانیت ئەڤا ئەو دبینیت راستە یان خەونە، دەنگێن هەواریان و هەژیانا ژۆرا وی نەهێلا خەو چاڤێن وی بگریت و پیچەك ماندیبوونا خۆ ژبیربكەت، دەستەكێ وی یێ ب سەرێ وی ڤە و یێ دیتر ب دەسكێ دەرگەی، هێدی هێدی ئەو یێ پتر هەست ب گێژبوونەكا نە نۆرمال دكەت، گاڤەكێ هند خۆ دیت یێ درێژبوویە ئەردی و كەفتی، هندی وێڤەترە پتر یێ هەست ب هەژیانێ دكەت، چاڤێن وی شێلیاتیەك یا ب سەردا هاتی و هەر تشت ل بەر چاڤێن وی یێ تاری دبن و باش نابینیت ، هەر یێ دبێژیتە خۆ ئەی هەوار ئەڤە چییە ل ڤێ شەڤا درەنگ رووددەت؟! ئەرێ ئەڤە خەونە یان راستیە ئەز دبینم؟! وەسا دیارە ئەز ڤێجارێ ب ساخی ژ ڤی ئاڤاهی نادەركەڤم و دێ ب دووماهیك هێم. هەر تشت یێ د هەژیێت و یێن ژ دیوار و سەر مێزەیان دكەڤن و دەرز ب شێوەكێ بلەز یێن خۆ ل سەر دیوارێن ئاڤاهی زال دكەن، چاڤێن وی ب دەمژمێرا دیواری كەفت دا بزانیت كا دەمژمێر چەندە؟ لێ ژ نشكەكێ ڤە دەمژمێر ژی كەفت و ئاڤاهی ب سەر دا هات و ل ڤێرێ دەم راوەستیا!
