ل ڤێ حەفتیێ دێ بەربژارێ پۆستێ سەرۆك وەزیران هێتە ئێكلاكرن
پەیڤدارێ هەڤپەیمانییا نەسر راگەهاند: ل ڤێ حەفتیێ دێ بەربژارێ پۆستێ سەرۆك وەزیرێن ئیراقێ و ل دەستپێكا سالا نوو یا زایینی ژی دێ هەرسێ سەرۆكایەتیێن ئیراقێ هێنە ئێكلاكرن ، هەروەسا دوپاتكر ژی د هەلبژارتنا بەربژارێ پۆستێ سەرۆك وەزیران دێ ئالیێ ناڤخوەیی و هەرێمی ل بەرچاڤ هێتە وەرگرتن.
چاڤەڕێ دهێتە كرن د دو حەفتیێن داهاتیدا هەموو پێرابوونێن پێدڤی یێن گرێدای ب هەلبژارتنێن جڤاتا نووونەرێن ئیراقێ ئەوێن ل 11/11/2025 هاتینە ئەنجامدان، ب دووماهی بهێن و دادگەها فیدرالی ژی ناڤێن بەربژارێن سەركەفتی یێن خولا شەشێ یا جڤاتا نوونەرێن ئیراقێ پەسەند بكەت.
د پێنگاڤا د دووڤدا ژی سەرۆكێ جڤاتا نوونەرێن ئیراقێ ژ پشكا سوننەیان و سەرۆككۆمار ژ پشكا كوردان دێ هێنە هەلبژارتن، پاشی دێ سەرۆككۆمار بەربژارێ مەزنترین فراكسیۆنا جڤاتا نوونەران بۆ پێكئینانا حوكمەتا نوو یا ئیراقا فیدرال راسپێریت.
سەلام زوبەیدی، پەیڤدارێ هەڤپەیمانییا نەسر ب سەرۆكایەتییا حەیدەر عەبادی، كو ئەو هەڤپەیمانییە پشكەكە ژ چارچۆڤەیێ هەماهەنگیێ شیعی، بۆ رۆژنامەیا (ئەلسەباح) یا حكومی یا ئیراقی راگەهاند» چارچۆڤەیێ هەماهەنگیێ ئەڤ حەفتییە دیاركریە بۆ هەلبژارتنا كەسەكی و بەربژاركرنا وی بۆ پۆستێ سەرۆك وەزیرێن ئیراقا فیدرال و بۆ هەلبژارتنا وی كەسی ژی ئالیێ ناڤخوەیی و هەرێمی و كەسایەتییا وی یا سیاسی و روانگەها وی یا ئابۆری دێ ل بەرچاڤ هێتە وەرگرتن كو دێ بیتە نوونەرێن ئیراقێ».
پەیڤدارێ هەڤپەیمانییا نەسر ئەوژی دیاركر» بۆ ئێكلاكرنا پۆستێ سەرۆك وەزیرێن ئیراقێ یێ داهاتی، چارچۆڤەیێ هەماهەنگیێ یێ پێگیرە ب ژڤانێن دەستووری و ئاماژە ژی بۆ وێ چەندێ دچن ل دەستپێكا سالا داهاتی 2026 ئێكلاكرنا سەرۆكایەتییان ( سەرۆكێ جڤاتا نوونەران، سەرۆككۆمار، سەرۆك وەیزران) ب دووماهی بهێت.
