ل ڤێ دووماهیێ گەلەک مەقامێن مۆزیکا کوردی هاتینە گوهۆڕین
زنار تۆڤی:
مۆزیكژه‌ن بێوار سالح، د دیداره‌كێ دا بۆ رۆژناما ئه‌ڤرۆ دبێژیت: ل سالا 2006 ێ، من پشكا مۆزیكێ ل په‌یمانگه‌ها هونه‌رێن جوان ل دهۆكێ ب دووماهی ئینایه، هه‌روه‌سا من پشكا موزیكێ ل زانكۆیا سه‌لاحه‌دین ل هه‌ولێرێ ب دووماهی ئینایه، دیسا ده‌مێ ئه‌ز ل په‌یمانگه‌ها هونه‌رێن جوان ل دهۆكێ ئه‌ز بۆ مه ده‌رچوویێ ئێكێ ل سه‌ر پشكا مۆزیكێ، هه‌ر وێ سالێ ئه‌ز بۆ مه مامۆستا ل په‌یمانگه‌هێ، پشتی هنگێ بۆ من ده‌لیڤه چێبوو، من باوه‌رناما ماسته‌رێ ل باژێرێ وانێ ل زانكۆیا یوزنجی یۆل، ل پشكا، كانێ چاوا مرۆڤ فێربیته موزیكێ، من وه‌رگرتیه و پشتی هنگێ ژی چه‌ندین سالان ئه‌ز مامۆستایێ پشكا موزیكێ بووم ل په‌یمانگه‌ها هونه‌رێن جوان ل دهۆكێ.
ناڤهاتی گۆت ژی: نوكه ئه‌ز ل وه‌لاتێ ئه‌لمانیا دژیم، ئه‌ز مژوولی خواندنا كورسه‌كی مه، ئه‌ز دخوازم بچمه زانكۆیه‌كێ و هێشتا بخوینم، هه‌روه‌سا ده‌مێ ئه‌ز چوویمه په‌یمانگه‌ها هونه‌رێن جوان ل دهۆكێ، ل پشكا موزیكێ هند ئامیرێن مۆزیكێ ژی نه‌بوون، من حه‌ز ژ ئامیرێ كه‌مانێ دكر، ل قووناغا دووێ بۆ سێیێ من بۆ خۆ ئامیره‌كێ كه‌مانێ كری، ژ حه‌ز ژێكرن من ئامیرێ كه‌مانێ هه‌لبژارت و گه‌له‌ك حه‌ز ژ وی ئامیرێ مۆزیكێ دكه‌م و نوكه ژی یێ به‌رده‌وامم ل سه‌ر كارێ موزیكێ.
بێواری گۆت ژی: ئه‌ڤه 20 ساله ئه‌ز د وارێ مۆزیكێ دا كاردكه‌م، من ب خۆ به‌خشی ژی كاركریه، دیسا د وارێ هونه‌ری دا دڤێت مرۆڤ یێ گه‌شبین بیت و نه یێ ره‌شبین بیت، كێماسی ژی یێن هه‌ین، به‌لێ گه‌نجێن مه یێن تێگه‌هشتین كا رامانا هونه‌ری و گرنگیا هونه‌ری چییه، ئه‌ڤ چه‌نده یا به‌ره‌ف باشییێ ڤه دچیت و دڤێت ئه‌م ژی گرنگیێ ب كلتۆرێ خۆ بده‌ین، هه‌تا نوكه من كلیپه موزیك ب شێوێ ته‌ك چێنه‌كرینه، به‌لێ من و ماموستا ئێحسان میكائیلی نێزیكی 10 كلیپه موزیكان بۆ كه‌نالێ وار چێكرینه، وه‌كی دیتر من پشكداری د چه‌ندین به‌رنامێن هونه‌ری دا كریه، هه‌روه‌سا ل كوردستانێ و ل ده‌رڤه‌یی كوردستانێ ژی، من تێكه‌لی ل گه‌ل هونه‌رمه‌ند و موزیكژه‌نێن كورد هه‌یه، ب تایبه‌تی ژی یێن هه‌ولێر و سلێمانیێ و رانیه و كویه و دهۆكێ و نوكه ژی ئه‌ز ل گه‌ل هونه‌رمه‌ند بلند ئیبراهیمی كاردكه‌م و به‌ری چه‌نده‌كێ مه كۆنسێرته‌ك ل وه‌لاتێ ئه‌لمانیا گێرایه.
هێشتا دبێژیت: هونه‌رێ كوردی ناسناما ملله‌تێ كورده، دیسان ده‌مێ تشته‌ك دبیته ناسنامه بۆ مرۆڤی، پێدڤییه جهێن شوله‌ژێ و وه‌زاره‌تا ره‌وشه‌نبیری، هنده‌ك بریاران بده‌ن و هنده‌ك كۆنفرانس ژی بهێنه كرن، ژ پێخه‌مه‌ت پاراستنا هونه‌رێ كوردی، داكو تام و ره‌سه‌ناتیا ڤی هونه‌ری نه‌هێته ژ ده‌ستدان و بهێته پاراستن، دڤێت حكومه‌ت خه‌مێ ژ ڤی بابه‌تی بخۆت و گرنگیێ پێ بده‌ت و چ باشه د ڤی واری دا بهێته كرن، دیسان ئه‌و مرۆڤێن بسپۆر د وارێ مۆزیكێ و هونه‌ری دا كۆمڤه بكه‌ت و پێكڤه كاربكه‌ن، ژ پێخه‌مه‌ت ئه‌ڤ هونه‌ره وه‌كو خۆ بهێته پاراستن و بهێته نڤێسین ژی.
وی مۆزیكژه‌نی گۆت ژی: پێدڤییه میلۆدیێن كوردی بهێنه نڤێسین و وه‌كو نڤێسینا نوتا موزیكێ و تۆماركرنا وان و هه‌موو بهێنه پاراستن، ژ پێخه‌مه‌ت نفشێن نوو ژی بزانن، دڤێت ئه‌ڤ كاره هه‌موو بهێنه كرن، داكو موزیكا كوردی تاما خۆ ژ ده‌ست نه‌ده‌ت، هه‌روه‌سا هه‌كه ئه‌م به‌حسێ وان موزیكا و ئه‌و سترانێن ل گۆڤه‌ند و ده‌واتان دهێنه گۆتن بكه‌ین، هه‌ر چه‌نده گه‌له‌ك ژ وان سترانان فولكلۆرێ كوردینه و هه‌ر كه‌س یێ ئازاده كانێ چاوا وان میلۆدیان بێژیت، به‌لێ ب راستی ژی ژ لایێ ریتمی ڤه كارتێكرنه‌كا مه‌زن لێ هاتیه كرن، گه‌له‌ك هه‌نه وان میلۆدیان بله‌ز دبێژن، دیسان په‌یڤێن وان گۆهارتینه، ده‌ستكاری د میلۆدیان دا كریه، له‌وما دڤێت جهێن شوله‌ژێ ڤێ چه‌ندێ سانسۆر بكه‌ن و لبه‌رچاڤ وه‌ربگرن و گوهداریا وان بكه‌ن، كانێ چ تشتێ دروست هاتیه گۆتن و چ تشتێ پێدڤیه بهێته كرن، داكو ئه‌ڤ هونه‌ره به‌ره‌ف راستڤه‌كرنێ ڤه بچیت و كلتۆرێ مه بهێته پاراستن، مخابنی مرۆڤ ژ هنده‌ك كاران عێجز دبیت، هه‌ر چه‌نده دروسته، نووخازی هه‌بیت، به‌لێ یا باشتر ئه‌وه مرۆڤ كاره‌كێ نوو چێكه‌ت، نه‌كو بچیت ده‌ستكاریێ د فولكلۆری دا بكه‌ت، ل ڤان دووماهیا گه‌له‌ك مه‌قامێ مۆزیكێ ژی هاتیه گوهۆرین، دابینی به‌یاته یا كریه مه‌قام نه‌هاوه‌ند، یان په‌یڤێن وێ یێن راكرین و مه‌قامه‌كێ دی دبێژن، كو گه‌له‌ك ده‌ستكاریا بێ سیسته‌م تێدا هاتیه كرن و ئه‌ڤ چه‌نده جهێ داخێ یه.
