ل گوندێ چەمەی ئاڤا گران و پیسا مالان دچیتە د ناڤا رووبارێ زێیێ مەزن دا
رەمەزان زەكەریا
گوندێ چەمەی ل سەر زێی مەزن ل دەڤەرا رۆڤیا ژبەر گرنگینەدان ب ساخلەمیا گشتی، چ سولین ژ بۆ ئاڤا جویێن ٦٠٠ مالێن گوندی نەهاتینە دانان، ئافا گران و پیسا مالان راستەوخۆ دچیتە ناڤ رووباری و ب رەنگەكێ گشتی ئاف پیس دبیت.
جێگر چەمەیی جوتیارەكێ گوندیە بۆ ئەڤرۆ گۆت: ئاڤا گوندی دچیتە ناڤ زیێ مەزن، ئەڤ ئاڤە ژی خەلك ل بەر كارێ جوتیاریێ دكەت و بۆ مالان و هەتا هەولێر و دەڤەرێن دیتر بۆ ڤەخوارنێ بكار دئینن و هەموو پیساتیە و ئاڤ پاقژ نابیت، ئاڤا حەمام و دەست شوو و لێنانگەهێ یە و خەلك دێ تووشی نەخۆشیا بیت.
ناڤبری گۆتژی: ئاڤا گوندی هەموو دچیتە ناڤ رووبارێ زێی مەزن پێدڤییە بهێتە چێكرن و سولینا بدانن بۆ پاقژكرنێ، نوكە زۆربەیا گەنجێن گوندی مەلەڤانیا دكەن و تووشی نەخۆشیا بووینە و حەساسی بۆ وان ل بەر پیساتیا ئاڤێ دروست بۆیە.
مەنهەل موافق، رێڤەبەرێ ناوچەداریا رۆڤیا بۆ ئەڤرۆ گۆت: ئەم هاتینە ئاگەهداركرن كو راستە ئاڤا پیسا مالان دچیتە ناڤ رووبارێ زێی مەزن، ئەم دێ لژنەیەكێ پێكئینین كو سەرەدانا سەر زێی بكەت و دێ ب نڤیسارەكا فەرمی ب رێیا دەڤەرداریا بەردەرەش ئاراستە كەین بۆ پارێزگارێ دهوكێ كو بهێتە چارەسەركرن.
