ل گوندەكی خوارن و سترانبێژ د دەواتان دا قەدەغە كرن
ئەڤرۆ
نەوزاد هلۆری:
ب مەرەما سڤككرنا رەوشا دارایی و ئابوریا وەلاتیان و كێمكرنا مەزختنان، ل كومەلگەها خەتارێ یا سەر ب پارێزگەها دهوكێ دانا خوارنێ و ئینانا سترانبێژی دناڤ دەواتان دا قەدەغە كر.
سەبارەت بابەتی مولحەم ڕەشۆ، هەلبژێرێ كومەلگەها خەتارێ یا سەر ب پارێزگەها دهوكێ گوت: (ب مەرەما بارسڤك كرنێ ل سەر ملێن گەنجان، مە وەكو جڤاتا كومەلگەهـ و گوندێ خەتارێ بریار دا كو ب چ ئاوایی نابیت ل دەمێ ئەنجام دانا دەوات و شەهیانان خوارن و ڤەخوارن و چونا سەر مەزاران، هەتا خوە ستران ژی بهێنە قەدەغە كرن).
مولحەمی زێدەتر گوت: (ئەڤ بریارە دبیت یا دەمكی بیت، هەكە كەسەكی ڤیا خوارنێ بدەت و دەواتێ بكەت ب ستران ڤە، دڤێت ل مالا خوە بكەت و یا سنوردار بیت ب مالا ویڤە).
لدووڤ ئاخفتنێن ناڤبری، هەر گەنجەكی ژ كچ و كورا پێشتر دەواتا خوە دكر نێزیكێ 33 ملیون دینارا د مەزاختن ژبەر وان داب و نەریتێن جڤاكی، بەلێ پشتی بریارێ مەزاختن بو خوار 10 ملیون دیناران هاتیە كێمكرن و گوت: (كچ و كور دڤێت ژیان و خێزانەكا نوو ئاڤا بكەن، نابیت ببنە بارگرانی و جهێ چاڤلێكرنێ بو زێدەبونا بارگرانی و مەسرەفێ بو خێزانێن دی ب تایبەتی تەخا هەژاران كو د نوكە دا هزاران كەس هەنە و نەشێن شەهیانێن خوە بكەن ژبەر مەزاختنا زور).
خەتارێ دكەڤیتە نێزیكی ناوچەداریا ئەلقوش، ئێكە ژ كومەلگەهن ئێزدیان، نێزیكێ 16 هزار كەسان تێدا دژین كو دبنە هزار و 500 خێزان.
