ل گوندەكێ ئاكرێ 100 سالن كریستیان و موسلمان پێكڤە دژین
رەمەزان زەكەریا
ل گوندێ نهاڤا ئاكرێ زێدەتر ژ سەد سالانە كریستیان و موسلمان ب برایەتی و تەبایی دگەل ئێك دژین و پشكداریێ د هەموو هەلكەفت و و پرسێن ئێك دو دا دكەن، بێی كو د ڤێ دیرۆكا درێژ دا چ ئاریشە د ناڤبەرا وان دا پەیدا ببن.
عەبدیشۆ ئیشۆ میخائیل، مۆختارێ گوندێ نهاڤا ژ پێكهاتەیا كریستیانە بۆ ئەڤرۆ گۆت: كو پێكڤەژیانا گوندی یا سەد سالانە و ب ئارامی بەردەوامە و هەردو پێكهاتە د هەموو بۆنەیێن ئایینی و نەتەوەیی دا پشكدارن و كەسایەتیێن وان ل سەر ئێك سفرە كۆم دبن و د هەموو وارەكێ ڤە پشتەڤانیا ئێك دكەن.
ناڤبری گۆتژی: كریستیانێن دەڤەرێ باوەریا تەمام هەیە كو ئەو ئازادی و پێكڤەژیانا ل هەرێما كوردستانێ هەیی ل چ جهێن دی نینە، ئەم دێ وەكی خۆشك و برا مینن و پەیوەندیێن جڤاكی چ جاران ناهێنە بڕین، ئەڤە ژی د دەمەكێ دایە كو ٩٠٪ـێ كریستیانێن ئیراقێ ل هەرێما كوردستانێ دژین و حكومەتا هەرێمێ ژیانەكا ئارام بۆ دابینكریە و ئەڤ پێكڤەژیانا جوان ل گوندێ نهاڤا ل ئاكرێ، وێنەكێ ڕاستەقینە یێ دیرۆكا دێرین یا هەرێما كوردستانێ یە، كو تێدا هەموو ئایین و نەتەوە ب ڕێزگرتن و حەزژێكرن دگەل ئێك دژین و د خۆشی و نەخۆشیان دا هەڤپشكن.
