ل گۆرەی پڕۆژە قانوونەكێ زیندانیێن ئیراقی دشێن حوكمێ زیندانكرنێ بكڕن
هەولێر، قائید میرۆ:
ل ئیراقێ پڕۆژە قانوونەك هاتیە بەرهەڤكرن و ل گورەی ئەڤی پڕۆژەی هەر زیندانیەكێ عیراقێ دشێت دەمێ زیندان كرنێ بكڕیت ژ حوكمەتێ، لێ ناكۆكی دناڤبەرا كۆتلەیێن سیاسی هەنە لدۆر ئەڤی پڕۆژەی جێگرا سەرۆكا لیژنا مافێ مرۆڤی ژی دبێژیت: مەترسی هەیە تاوانێن مەزن ژی ڤەگریت و دەستێن سیاسی ل پشت هەبن.
جوان عەبدوللا، جێگرا سەرۆكێ لیژنا مافێ مرۆڤی ل پەرلەمانێ عیراقێ بۆ رۆژنامەیا ئەڤرۆ دیار كر” پڕۆژەیەك ژلایێ حوكمەتا ئیراقێ هاتیە بەرهەڤ كرن و تێدا ل گورەی ئەڤی پڕۆژەی هەر زیندانیەكێ عێراقی دشێت دەمێ دهێتە حوكم كرن رۆژێن زیندان كرنێ بكڕیت، ئەو پڕۆژە ل سالا 2019ێ ژلایێ جڤاتا بلندا دادوەریێ هاتیە پێشنیار كرن و ژلایێ هژمارەكا پەرلەمانتاران بوویە پڕۆژە قانوون، ل هەیڤا نیسانا بۆری ئێخستە دناڤ خشتەیێ كارێ پەرلەمانی هەتا خواندنا ئێكێ بۆ بهێتە كرن و گۆت: بەلێ ژبەر وان ناكۆكیێن ل سەر ئەڤی پڕۆژە قانوونی هەی ژلایێ كۆتلەیێن سیاسی یێن پەرلەمانێ ئیراقێ خواندنا ئێكێ بۆ نەهاتە كرن، چونكی دناڤا پەرلەمانێ عیراقێ دا ناكۆكی ل سەر هەنە و ل دەرڤەی پەرلەمانی ژی بۆچوونێن جودا هەنە دناڤا بسپۆرێن قانوونی.
جوانێ گۆتژی: بهانەیا بەرهەڤكرنا ئەڤی پڕۆژەی ئەوە رەوشا زیندانیێن عیراقێ زۆر یا خرابە و چەندین نەخۆشی دناڤا زیندانێن ئیراقێ بەلاڤ بووینە، فشارەكا زۆر ل سەر زیندانێن ئیراقێ هەیە و دخوازن بڤێ رێكێ هندەك ئەو بارگرانیا ل سەر زیندانێن عیراقێ هەی سڤك بكەن.
جێگرا سەرۆكێ لیژنا مافێ مرۆڤی ل پەرلەمانێ ئیراقێ د بەردەوامیا ئاخفتنێن خۆدا دیار كر كو ل گورەی ئەڤی پڕۆژە قانوونی كڕینا رۆژێن زیندان كرنێ مەرجێن خۆ هەنە، ئانكو هەموو زیندانیەكێ هاتیە حوكم كرن نەشێت ئەو رۆژێن مای ل زیندانێ بكڕیت بۆ نموونە تاوانێن مەزن یێن تیرۆرێ و تاوانێن نامووسێ و مادێن بێهۆشكەر ناگریت و گۆت: هەروەسا تاوانێن دیژی دڤێت ئەو تاوان بن یێن دەمێ وان ژ سێ سالان زێدەتر نەبیت بۆ نموونە كەسەك ل سەر تاوانەكێ هاتبیتە حوكم كرن بۆ دەمێ سێ سالان و سالەك دەرباز كربیت دشێت ل گورەی ئەڤی پڕۆژەی دو سالێن مایی بكڕیت بۆ هەر رۆژەكێ 10 هزار دینار هاتینە دیار كرن، بەلێ ئەڤێ چەندێ ژی مەرجێ خۆ هەیە دڤێت كەسێ بەرامبەر تەنەزۆلێ بكەت.
جوانێ زێدەتر گۆت: ئەز بخۆ ل گەل ئەڤی پڕۆژە قانوونی نینم، چونكی مەترسی هەیە ئەڤە ئیراقە رەنگی دەستوەردانێن سیاسی بهێنە كرن و پاشەڕۆژا تاوانێن دیژی ڤەگریت و بۆ مەرەمێن خراپ بهێتە بكارئینان، نوكە پەرلەمان یێ د بهێنڤەدانێ دا نزانن دێ ئەو پڕۆژە قانوون سەر گریت یان ژی دێ شكەستنێ ئینیت ل پەرلەمانی، چونكە ناكۆكیێن كۆتلەیێن سیاسی ل پەرلەمانی هەتا نوكە ئاستەنگ بوویە ل هەمبەر ئەڤی پڕۆژەی، راستە رەوشا زیندانێن ئیراقێ زۆر یا خرابە و مە زانیاری هەنە چەندین ئاریشە هەنە دناڤا زیندانان، بەلێ گومان ژی ل سەر ئەڤی پڕۆژە قانوونی هەنە و مەرج نینە ببیتە چارەسەر بۆ ئاریشا زیندانێن عیراقێ.
