ل گەل پتریا سترانبێژان كاركریە
زنار تۆڤی:
كۆشیار شێركۆ، مۆزیكژەنەكێ خەلكێ سلێمانیێ یە، د دیدارەكێ دا بۆ رۆژناما ئەڤرۆ دبێژیت: د زارۆكاتیا خوە دا و ل چالاكیێن قوتابخانەیان من دەست ب كارێ مۆزیكێ كریە، ل دەستپێكێ ب ئامیرێن ریتمی، پاشی ئامیرێ پیانۆیێ، د دووڤدا چوومە پەیمانگەها هونەرێن جوان پشكا مۆزیكێ ، هەروەسا من كولیژا هونەرێن جوان پشكا مۆزیكێ ل سلێمانیێ ژی خواندیە، هەتا نوكە من پشكداری د چەندین كۆنسێرتێن ئۆركێسترایێ دا كریە، دیسان وەكو سەرپەرشتیارێ گرۆپی ژی پشكداری د وان كۆنسێرتان دا كریە.
ناڤهاتی گۆت: ل پەیمانگەها هونەرێن جوان من ئامیرێ كەمانێ هەلبژارت و هەر ژ سالا 2011 هەتا نوكە دژەنم، ل دەرڤەیی كوردستانێ ژی، من پشكداری د چەندین كۆنسێرتان دا كریە، ژوانا ل وەلاتێن بریتانیا و هۆلەندا و سوید، بۆ دەمێ چەندین سالان ژی من وانەیێن تایبەت یێن مۆزیكێ گۆتینە و ئەڤە شەش سالن ل گەل هونەرمەند ئەحمەد خەلیل كاردكەم، نوكە ژی مژوولی كارێن لایڤ مۆزیكێ مە، هەروەسا كارێن ستۆدیۆیی و بەرنامەیێن تەلەڤزیۆنی و ئەز دشێم بیژم من كارێ هونەری ل گەل پتریا سترانبێژان كورد كریە.
