ل ھەرێما کوردستانێ رۆژێ 22 ژن دھێنە تەلاقدان
ئه‌ڤرۆ نيوز:
پارێزەرەک ئیماژە بڤێ چەندێ دکەت، ل سێ سالێن بۆری دا رێژەیەکا مەترسیدار یا تەلاقێ ل ھەرێما کوردستانێ ھاتیە تۆمارکرن و گورەی ئامارا سێ سالێن بۆری دا نێزیکی سەد ھزار زارۆا بووینە قوربانی ئاریشەیا تەلاقێ و ئەڤ زارۆیە ل سۆزا دایک و بابا بێ بەھر بووینە، ژبەرکو قوربانیێ ئێکێ یێ تەلاقێ زارۆیە، شەھرەزایەک ژی دبێژیت، زارۆیێن دبنە قوربانی تەلاقێ پتر نێزیکی تاوانان دبن.
پارێزەر عەدنان شاکر، بۆ رۆژناما ئەڤرۆ گۆت” ل ھەرێما کوردستانێ تەلاقێ رێژەیەکا پێوانەیی تۆمارکریە و گورەی ئامارا بەردەستێ من، ددەمێ سێ سالێن بۆری دا 45 ھزار و 700 حالەتێن تەلاقێ ھاتینە تۆمار کرن، ئەڤەژی ڤێ چەندێ دگەھینیت، کۆ ددەمێ سێ سالێن بۆری دا 45 ھزار خێزان ھاتینە ھەلوەشاندن و 45 ھزار ئافرەت بێ سەرپەرشت ماینە، ئەڤەژی کارەساتە بۆ ھەرێمەکا وەکی ھەرێما کوردستانێ ددەمێ سێ سالاندا ئەڤ رێژەیا تەلاقێ بھێتە تۆمارکرن، ئەگەر بھێت و ھەر خێزانەکا ژێکڤەبووی ئێک زارۆ ھەبیت ئەڤە 45 ھزار زارۆ ژ نازێن دایک و بابان بێ بەھر دبن، بەلێ بێگومان خێزان ھەنە دو زارۆ و پتر ژی ھەنە، ئەگەر بڤێ شێوەی لێکدانێ بۆ بکەین ئەڤە ددەمێ سێ سالێن بۆری دا 90 ھزار زارۆک بۆینە قوربانی تەلاقێ، ھەر گورەی ئەڤێ ئامارێ رۆژانە 22 ژن دھێنە تەلاقدان، قوربانیێ ئێکێ ژی ل تەلاقێ زارۆنە”.
لەشکەر عەلی ئەکبەر، مامۆستایێ زانکۆیا سەلاحەددین بۆ رۆژناما ئەڤرۆ دیارکر” ئێک ژ کاریگەریێن خراپ یێن تەلاقێ دبیتە ئەگەرێ ھەرفینا خێزانێ، ھەرفینا خێزانێ کاریگەریەکا راستەوخۆ لسەر زارۆیان ھەیە و زارۆ دبنە قوربانی، زۆرترین زارۆیێن بێ سەرپەرشت ژ ئەگەرێ تەلاقێ بووینە، ھەم خۆدانکرنا ئەڤان زارۆیان یا ب زەحمەتە، ھەم ژی ئەڤ زارویێن ب ئەگەرێ تەلاقێ بێ سەرپەرشت دمینن نێزیک دبن ل ئەنجامداانا تاوانا، کەسایەتیا زارۆیی ب رۆلێ دایک و بابا دھێتە چێکرن، ئەگەر زارۆ بێ دایک و باب بوو، کاریگەری ھەیە بۆ ھەرفینا رەوشا دەروونی یا زارۆیی، لەوڕا بێگومان زارۆیێن پاش تەلاقێ دمینن زێدەتر تاوانان ئەنجام ددەن، ژبەرکو ئەو زارۆیێن تاوانا ئەنجام ددەن دوورن ژ سۆزا دایکێ و ئەسلەن چو ژ دەربارەی سۆزا دایکێ نزانن.
