ل 79 سالیا دامەزراندنا پارتی سلاڤ ل بارزانیێ نەمر بن
سـەبـاح بیتوللا
مللەتان پێدڤی ب رێبەر و سەرۆكێن مەزن و فیداكار هەیە، مللەتێن بندەست و ستەملێكری بۆ ئازادی و رزگاریا خۆ، بزاڤ و شۆرش و سەرهلدان و بەرخۆدانێ دكەن، لێ بۆ ڤێ چەندێ پێدڤی ب رێبەر و سەرۆكەكێ زانا و فیداكار و خودان هەلوەست هەیە، تاكو هیڤییا مللەتێ خۆ بدەستڤە بینیت.
مەرەم ژ ڤێ پەیڤێ مللەتێ كوردە، كو پترە ژ سەد سالان هەول و بزاڤان بۆ رزگاریێ و ئازادیێ ددەت و رێبەر و سەرۆكێ هەرە دیار و بەرچاڤ و ناڤدارێ تەڤگەرا رزگاریخوازیا گەلێ كوردستانێ مستەفا بارزانی یە.
ئەو سەركردەیێ شیای 60 سالێن تەمەنێ خۆ بۆ خزمەتا گەلێ خۆ و بۆ ئازادی و رزگاریێ تەرخان بكەت…
چ ئاستەنگ و بەربەست نە شیاینە رێكێ ل ڤی سەركردێ مەزن بگرن و ل سەر فیداكاریێ و هەتا دوماهی رۆژا ژیانا خۆ بەردەوام بوو.
وەكو ڤێ بیرهاتنێ دكەینەڤە، بیرهاتنا دیرۆكەكا سەربلندی دكەینەڤە، بیرهاتنا دەهان ئەزموون و سەربۆڕان دكەینەڤە، بیرهاتنا خەباتەكا دویر و درێژ دكەینەڤە، بیرهاتنا هەمی شۆرش و سەرهلدانێن كوردان دكەینەڤە.
پرسیارەك د ڤێرێ دا سەرێ خۆ هەل ددەت و دبێژیت؟
بۆچی بارزانی بوویە هێما و ناسنامەیا مللەتێ خۆ؟ چونكی مللەتێ خۆ ل نا ئومێدیێ رزگاركر… باوەری ب سەركەفتنا دۆزا مللەتێ خۆ هەبوو كاودان چەندێ دژوار و گران بیت. راستە دبێژن، بەیاڤ ب سالێن درێژ دهێتە پیڤان، قۆناغ ب كریار و هەلوەست و فیداكاری دهێتە دەستنیشانكرن، حوكمێ دیرۆكێ بۆ مللەتی دمینیتەڤە كو ل سەر مرۆڤی بریارێ بدەت و مللەت هەلسەنگاندنا رێبەر و سەركردەیێن خۆ دكەن.
بارزانیێ نەمر ل هەمی پارچێن كوردستانێ خەبات كریە و قوربان داینە لەوا بوویە هێما و ناسنامەیا گەلێ كوردستانێ.
بارزانیێ نەمر بوویە دیاردەكا سیاسەتا كوردی ل رۆژهەلاتا ناڤین و جیهانێ و هەروەسا بوویە قوتابخانەیەكا مەزنا شۆرشگێری و فێكرنێ.
ئێك ژ بەر چاڤترین دەستكەفتێن خەباتا بارزانی بۆ كورد و كوردستانێ هەروەكو پرۆفیسۆر (میخائیل لازاریف) كوردناسی و رۆهەلاتناسێ رۆسی دبێژیت (كێشەیا مللەتێ كورد ژ كێشەیەكا ناڤچەیێ بكەتە كێشەیەكا نێڤدەولەتی).
بارزانیێ نەمر د هەمی ژیانا خۆ دا بۆ خزمەتا كورد و كوردستانێ ب ئارمانجان ڤە یێ گرێدایی بوو نەك ب مەرجان ڤە، لەورا بارزانی شیا گەلەك دەستكەفت و سەروەریان بۆ گەلێ خۆ بدەستڤە بینیت.
سەرێ رێز و هۆرمەتێ بۆ گیانێ بلند و بەرزێ رێبەرێ نەتەوا كورد بارزانیێ نەمر دچەمینن و حەتا نهۆ ژی رێبازا پیرۆزا وی ل سەر خەبات و قوربانیدانێ هەرا بەردەوامە حەتا گەهشتن ب سەرفەرازیا ئێكجاری.
ل دوماهیێ دبێژینێ هزار هزار سلاڤ ل گیانێ بلند و پیرۆزێ تەبن هندی سلاڤ د دونیایێ دا هەبن.
