ماسیگره‌ك: من ماسیێن پتر ژ 70 كیلۆیان نێچیركینه
ئه‌ڤرۆ، ره‌مه‌زان زه‌كه‌ریا:
سالانه ل ده‌مێ وه‌رزێ ماسیگرتنێ ل ده‌ڤه‌را بارزان چه‌ندین كه‌س كارێ وان یێ سه‌ره‌كی ماسیگرتنه و ب شه‌ڤ و رۆژ ل سه‌ر رووبارێن ده‌ڤه‌رێ كارێ ماسیگرتنێ دكه‌ن و ئاشكرا دكه‌ن، ماسیێن هند مه‌زن كه‌فتینه قولابا وان و نه‌شیاینه ژ ئاڤێ بیننه ده‌رێ.
عه‌بدولره‌حمان ئاسته‌یی، ماسیگره‌كێ ده‌ڤه‌را بارزانه بۆ ئه‌ڤرۆ گۆت: ده‌مێ چه‌ندین سالایه كارێ ماسیگرتنێ دكه‌م ل سه‌ر رووبارێ زێی مه‌زن ل ده‌ڤه‌را بارزان و پرانیا جاران كو بۆ ماسی گرتنێ سه‌ره‌دانا زێیێ مه‌زن دكه‌م، ماسیێن باش گرتینه و ماسی گرتنێ شاره‌زایی پێدڤی دڤێت و هند ژی بهێنفره‌هی پێدڤیه.
گوت ژی: كارێ ماسی گرتنێ یێ ب ساناهی نینه، ده‌مه‌كێ زۆر دڤێت، تشتێ سه‌ره‌كی ئه‌وه مرۆڤ گه‌له‌ك یێ بهێنفره‌بیت هه‌تا بشێت ماسیا بگریت، پێدڤیه ل سه‌رمایێ و گه‌رمێ و بلند بوونا ئاستێ ئاڤێ و خۆ راگربیت، ئه‌و ماسی گرێ دڤێت ماسیێن باش بگریت.
خویا كر: دگه‌ل دوو ماسیگرێن دی پێكڤه چه‌ندین ساله كارێ ماسیگرتنێ دكه‌ین و هه‌تا نوكه مه ماسیێن زۆر باش گرتینه، بۆ نموونه 20 كیلۆ 30 كیلۆ 40 كیلۆ 50 كیلۆ ماسێ پتر ژ 70 كیلۆیا من گرتیه و به‌رده‌وامم لسه‌ر ماسیگرتنێ، ماسیێن زۆر مه‌زن هه‌نه دناڤ رووبارێ زێی مه‌زن و ل ده‌مێ بووری من ماسیێن هند مه‌زن گرتینه من نه‌شیایه ژ ئاڤێ بینمه ده‌ر كو پێشبینی دكه‌م 150 كیلۆ بیت.
عه‌بدولره‌حمان گۆت: ئه‌ز ماسیا ب قولابێ دگرم و ب رێكێن ساده و پێگریێ ب رێنمایێن ژینگه‌هێ دكه‌ین، ده‌مێ راڤه ماسی دهێته قه‌ده‌غه‌كرن مه ئه‌م ناچینه ماسیا، چو جارا مه سه‌رپێچی نه‌كریه ل گرتنا ماسیا ناكه‌ین ژی، نوكه ده‌مێ جووت بوونا ماسیایه و ماسیگرتن قه‌ده‌غه‌یه، هه‌تا هه‌یڤا شه‌ش ئه‌م ژی پێگرین ب رێنمایێن ژینگه‌هپارێزیێ و ناچینه ماسیا.
