مافیا گەفان ل داعشێ دکەت
ئەڤرۆ نیوز، ئەیاد بەرواری:
سەرکردەکێ مافیا ئەمریکی د دیدارەکێ دا ل گەل کەنالەکێ تەلەڤزیونی داخواز ژ ئاکنجیێن نیویۆرک کر کو ژ نوکە و پێڤە ژ رێکخستیا داعشێ نە ترسن، چونکی دێ مافیا ئەرکێ پاراستنا نیویۆرک ب ستوویێ خوەڤە گریت.
جیوفانی گامبیۆ ئێک ژ سەرکردێن مافیا ئەمریکی د دیدارا خوەدا ل گەل کەنالێ ( ئێن بی سی) یێ ئەمریکی گوت” داعش ژ مافیایێ دترسیت”.
ل دووڤ رۆژناما (دیلی میل) یا بریتانی، جیوفانی گامبیۆ کورێ ئێک ژ مەزنترین سەرکردێن مافیایێ یە ل نیویۆرکێ کو خێزانا وی ئەوا بەرنیاس ب تاوانێن کوشتن و دزینێ ب چەکی، ل دەستپێکا سالێن شێستان ھاتیە نیویۆرک و نوکە ئەو د بیاڤێن سیناریویێ و رۆمانا بۆ فلمێن ھولیوودێ کار دکەت.
جیوفانی دبێژیت” مافیایێ ناڤودەنگیەکا نەباش یا ھەی، بەلێ مافیایێ لایەنێ باشیێ ژی یێ تێدا ھەی و ئەم دخوازین وی لایەنی دیارکەین ب ڕێیا دابینکرنا ئێمناھیێ بۆ ئاکنجیێن نیویۆرکێ”.
ڤی سەرکردێ مافیا ئەمریکی رەخنە ل ئەکتەرێن ستێرێن ھولیوودێ گرت وەکو (ئەلبتشینۆ و روبەرت دینیرۆر) ژ بەر کو ل بەرامبەر تیرۆرا جیھان تووش دبیتێ رانەوەستیان.
