مالا من ل ده‌ستپێكێ رێگر بوون لێ نوكه پشته‌ڤانن
دهۆك، شاكر ئه‌تروشی:
شه‌بنه‌م یوسفی، ئه‌كته‌را به‌رنیاسا رۆژهه‌لاتێ كوردستانێ و وه‌لاتێ ئیرانێ، كو نوكه یا ل دهۆكێ و پشكدارا فلمه فیسته‌ڤالا سینه‌مایی یه، د دیداره‌كێ دا بۆ رۆژناما ئه‌ڤرۆ دیاركر كو خه‌لكا باژێرێ ئۆرمیێ یه، به‌ری ده‌ه سالان ده‌ست ب كارێ هونه‌ری كری یه و هه‌تا نوكه وه‌ك ئه‌كته‌ر پشكداری د ده‌ه شانۆگه‌ریان هه‌روه‌سا ده‌ه فلم و كورته فلمان دا كریه و دو جاران ژی خه‌لاتێ باشترین ئه‌كته‌ر وه‌رگرتیه، كو ئه‌و ژی ل سالێن 2016 و 2017 بوو.
شه‌بنه‌مێ گۆت: ئه‌ڤه جارا دویێ ئه‌ز دهێمه باژێرێ دهۆكێ و دڤێ ڤیسته‌ڤالێ دا ب دیتنا گه‌له‌ك هونه‌رمه‌ند و سینه‌ماكاران شاد بووم، هه‌لبه‌ت كارێ هونه‌ری بۆ ژنێ ل رۆژهه‌لاتێ كوردستانێ گه‌له‌كێ ب زه‌حمه‌ته چنكو ئاسته‌نگ دمشه‌نه، لێ مه خوه راگرت و ئه‌و ئاسته‌نگ ده‌ربازكرن، بۆ زانین من هنده‌ك سه‌ربۆر ل گه‌ل شانۆیێ ژی هه‌نه‌و ل گه‌له‌ك شانۆگه‌ریان پشكداربوویمه، ژوانا شانۆگه‌ریا میدئا كو ئه‌ز ده‌رهێنه‌ر بووم، هه‌روه‌سا رۆلێ سه‌ره‌كی ژی یێ من بوو.
ل دووماهیێ گۆت: به‌ری هاتنا كۆرنایێ من ل به‌ر بوو بهێمه دهۆكێ و كاره‌كێ هونه‌ری ئه‌نجام بده‌م، لێ رێ هاتنه گرتن و نه‌شیام بهێم، هیڤیا من ئه‌وه ل ده‌مێ بهێت پشكداریێ د فلمه‌كی دا بكه‌م كو ل دهۆكێ بهێته چێكرن، هه‌روه‌سا حه‌زدكه‌م من په‌یوه‌ندیێن باشتر ل گه‌ل هونه‌رمه‌ند و سینه‌ماكارێن دهۆكێ هه‌بن، بۆ زانین ل ده‌ستپێكێ مالا من رێگرێن كارێ من بوون، لێ نوكه پشته‌ڤانن.
