مالپەرەكێ ئەمریكی: سیستەمێ بانكییێ ئیراقێ دێ تووشی كێشەیەكا نوو بیت
مالپەرێ (بلۆمبێرگ) یێ ئەمریكی بەلاڤكر: ترس ل دەف بازرگان و سەرمایەدارێن ئیراقێ یا هەی ئەمریكا سزایێن نوو ل سەر سیستەمێ بانكیێ وی وەلاتی ب سەپینیت.
پشكەك ژ هەڤوەلاتی و بازرگانێن ئیراقێ ژ ئەگەرێ وان مەترسیێن ل سەر سیستەمێ بانكیێ ئیراقی هەی، پارەیێن خوە رادكێشن، ژ ئەگەرێ وێ چەندێ هۆشداری دهێتە دان ژ پەیدابوونا قەیرانەكا كوور یا پارەیێ نەختینە و ئەگەرێ ژ ناڤچوونا پشكەك ژ بانكان ژی ب دوور ناهێتە زانین.
ل دەستپێكا ئەڤسالە بانكا ناڤەندییا ئیراقی پڕۆسەیێن حەوالەیێن دۆلاری رادەستی بانكێن تایبەت كر، ب شێوەیەكی كو نێزیكی 10 بانكان وێ پڕۆسەیێ ئەنجام ددەن و ب رێكا بانكێن ناڤبرڤە وی پارەی حەوالە دكەن كو بازرگان داخواز كریە.
مالپەرێ (بلۆمبێرگ) یێ ئەمریكی ئەوچەندە ئاشكراكر» ترس ل دەف بازرگان و سەرمایەدارێن ئیراقێ یا هەی ئەمریكا سزایێن نوو ل سەر سیستەمێ بانكیێ ئیراقی ب سەپینیت، ب تایبەتی د دەمەكیدایە كو ترەمپ وەكو سەرۆكێ نوو یێ ئەمریكا یێ دەستبكاربووی و دەست ب پێداچوونێ بۆ سیاسەتێن كۆچكا سپی یا كری».
كێشەیەكا دی بۆ سیستەمێ بانكیێ ئیراقێ یا دروستبووی، بازرگان و سەرمایەدارێن كارێ وان ب حەوالەیێن دۆلاری هەی، پارەیێن خوە ژ وان بانكان دكێشن، كو دناڤ سیستەمێ حەوالەیێن دۆلاریدا نینن، ب شێوەیەكی كو عادل نوی، رێڤەبەرێ بجهئینەرێ بانكا كەنداڤییا بازرگانی راگەهاند» تنێ ل دوماهییا سالا 2024 زیانێن ڤەكێشانا پارەی ژ وێ بانكێ گەهشتە 210 ملیار دیناران كو ئەڤە ژ ئەگەرێ وێ چەندێیە بانكا ناڤبری پشكداری د حەوالەیێن دەرەكیدا ناكەت».
