مامۆستایه‌كێ زانكۆیێ” پشتی كۆرۆنایێ دڤێت سیسته‌مێ خواندنێ ل زانكۆیا بهێته گوهورین
مامۆستایه‌كێ زانكۆیێ بگرنگی دبیت وه‌ك وه‌لاتێن پێشكه‌فتی پشتی په‌ژیكا كۆرنایێ به‌ره‌ف كێمبوونێ دچیت هزر ل گوهورینا سیسته‌كێ خواندنێ دا بهێته‌كرن و رێكخه‌ری دناڤبه‌را وه‌زاره‌تا خواندنا بلند و وه‌زاره‌تێن دی و جڤاكی دا بهێته‌كرن.
د.زێره‌ڤان به‌رواری مامۆستایێ زانكۆیێ، بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ گۆت: گرنگه پشتی په‌رژیكا كورونایێ ب دووماهی بهێت هنده‌ك گوهورین ل سیسته‌مێ خواندنێ دا بهێنه‌كرن ژوان گوهورینان بكارئینانا ئونلاین، ره‌نگه ئه‌م ل كوردستانێ وی ئاستی نین كو ب خواندنا ئونلاین به‌رده‌وامیێ بده‌ینه پرۆسێسا خواندنێ و مه پێدڤی ب تاقیگه‌ه و هه‌ر تشته‌كێ دی هه‌بیت و گرنگه وه‌زاره‌تا خواندنا بلند پلانه‌كا دی هه‌بیت بۆ پشتی په‌ژیكا كورونایێ و گرنگه به‌لانسه‌ك بهێته دروستكرن بۆ خواندنا ئونلاین و بۆ خواندنا ده‌مێ قوتابی به‌رهه‌ڤ دبیت.
هه‌مان مامۆستایێ زانكۆیێ گۆت: ل وه‌لاتێ بریتانیا جوره به‌لانه‌سه‌ك هاتیه دروستكرن ده‌مێ كۆرونا زێده دبیت خواندن دبیته ئونلاین و ده‌مێ كۆرۆنا كێم دبیت سیسته‌مێ دناڤ هولێن خواندنێ دهێته په‌یرۆكرن و بڤی ره‌نگی سستی ناكه‌ڤیته خواندنێ به‌لكو به‌رده‌وامی هه‌یه و قوتابی ناهێته دروسخستن ژ خواندنێ.
د.زێره‌ڤانی ئه‌و ژی گۆت: به‌ری په‌ژیكا كورونایێ ل زانكۆیێن كوردستانێ چه‌ندین قه‌یران هه‌بووینه بۆ نموونه ل سازیێن وه‌زاره‌تا په‌روه‌ردێ وه‌ك قوناغا سه‌ره‌تایی و ناڤنجی و ئاماده‌یی زمانێ كوردی دهێته خواندن و ده‌مێ دهێته زانكۆیێ زمانێن عه‌ره‌بی و ئنگلیزی دهێته خواندن و ئه‌ڤه دبیته فاكته‌ره‌ك قوتابی ل ڤێ قوناغێ به‌رهه‌ڤی بۆ زانكۆیێ نه‌كربن و پێزانینێن باش نین و ئه‌ڤه كێشه‌كا سه‌ره‌كی یه و دیسا نه‌گوهورینا سیسته‌مێ خواندنێ و تایبه‌ت ئه‌گه‌ر به‌حسێ بابه‌تێن مرۆڤایه‌تی بكه‌ین و ئه‌ڤ بابه‌ته گه‌له‌ك دكه‌ڤن په‌رتووكێن سالێن حه‌فتێ و هه‌شتێان دهێنه بكارئینان و دڤێت پرۆگرامێن خواندنێ بهێنه گوهورین و دا قوتابی بشێت خوه ل گه‌ل كه‌تواری خوه ب گونجینت.
د. زێره‌ڤان به‌رواری ئه‌و ژی گۆت: نه‌بتنێ دناڤبه‌را وه‌زاره‌تا په‌روه‌ردێ و خواندنا بلند رێكخه‌ری نینه به‌لكو رێكخه‌ری دناڤبه‌را زانكۆیێ و جڤاكی ژی دا نینه كو بشێت خزمه‌تا جڤاكی بكه‌ت كو خه‌لكێ مه كا پێدڤی ب چیه ، هه‌كه مه بڤێت زانكۆیێن مه پێش بكه‌ڤن دڤێت ته‌نسیقه‌ك دناڤبه‌را زانكۆ و جڤاكی دا بهێته دروستكرن و هه‌مان ده‌م ژی دا دناڤبه‌را خواندنا بلند و وه‌زاره‌تێ، دی ژی دا هه‌بیت و كا جڤاك پێدڤی ب چ هه‌یه و خزمه‌تا خه‌لكێ مه بهێته‌كرن و ئه‌ڤه بۆ هه‌موو زانكۆیێن كوردستانێ تایبه‌ت و حوكمی.
