مامۆستایه‌كێ زانكۆیێ: دڤێت پارێ كریا خواندنێ ل وه‌رزێ ئێكێ ژ قوتابیان نه‌هێته وه‌رگرتن
هه‌ولێر، قائید میرۆ:
هه‌ر سال ب ئه‌گه‌رێ رێڤه‌چوونا پڕۆسا وه‌رگرتنا قوتابیان ب رێیا سیسته‌مێ ناڤه‌ندی ده‌رچوونا ناڤێن قوتابیێن قۆناغا ئێكێ یا زانكۆ په‌یمانگه‌هان گیرو دبیت مامۆستایه‌كێ زانكۆیێ ژی دبێژیت: پێدڤیه كریا وه‌رزێ ئێكێ نه‌هێته وه‌رگرتن و دڤێت پێداچوون د سیسته‌مێ وه‌رگرتنا قوتابیان بهێته‌كرن ب شێوه‌یه‌كێ ده‌ستپێكا سالا خواندن قوتابیێن ده‌رچویێن پۆلا 12ی ئاماده‌یی ل زانكۆ په‌یمانگه‌هان بهێنه وه‌رگرتن.
د. سادق سه‌رگه‌تی، مامۆستایێ زانكۆیێ بۆ به‌رپه‌رێ په‌روه‌رده و زانكۆ یێ رۆژناما ئه‌ڤرۆ دیاركر پێدڤیه پێداچوون ب سیسته‌مێ وه‌رگرتنا قوتابیێن زانكۆ په‌یمانگه‌هان بهێته‌كرن كو سالانه ده‌مێ وه‌رگرتنا قوتابیان ل زانكۆ په‌یمانگه‌هان گیرودبیت و كاریگه‌ریا خۆ سه‌ر ره‌وشا قوتابیان و پڕۆسا خواندنێ ل زانكۆ په‌یمانگه‌هێن تایبه‌ت و حكومی ئه‌ڤه ژی بۆ خراپیا سیسته‌مێ وه‌رگرتنا قوتابیان ڤه‌دگه‌ڕیت، چونكه هه‌ر ساڵ پڕۆسه دهێته گیرۆكرن و قوتابی ژی باجا ئه‌ڤێ گیرووبونێ دده‌ن، له‌وڕا پێدڤیه خواندنا بلند و ڤه‌كۆلینێن زانستی پێداچوونه‌كا ته‌مام ل سیسته‌مێ وه‌رگرتنا قوتابیان بكه‌ن و زویتر ناڤێن قوتابیان بهێنه راگه‌هاندن و مامه‌له‌یێن وان ل زانكۆ په‌یمانگه‌هان بهێنه‌كرن، هه‌تا بشێن دده‌مێ گونجایی ده‌ست ب ده‌واما خۆ بكه‌ن، بتایبه‌تی ئه‌ڤ ساله ژبه‌ر شاشیێن سیسته‌مێ وه‌رگرتنێ و بڕیارا پێداچوونێ وه‌رگرتنا قوتابیان گیربوویه و هه‌تا نوكه هنده‌ك زانكۆ و په‌یمانگه‌هێن ئه‌هلی پڕۆپاگنده‌یێن وه‌رگرتنا قوتابیان دكه‌ن، ئه‌ڤه ئێك ژوان پێنگاڤێن خراپ ل سه‌ر كه‌رتێ خواندنێ ل هه‌رێما كوردستانێ و دڤێت نه‌مینیت.
د. سادق سه‌رگه‌تی ئاماژه‌كركو نه‌دادپه‌روه‌ری دوه‌رگرتنا كریا خواندنێ ژی هه‌یه، قوتابی هه‌یه هێشتا ده‌ست ب ده‌وامێ نه‌كریه، یان چه‌ند رۆژه‌كێن كێم ده‌واما زانكۆیێ كریه ئێكسه‌ر دبیته نیڤا سالێ و پارێ كریا خواندنا بۆ ئێك وه‌رز دهێته وه‌رگرتن، ئه‌ڤه ژی نه‌حه‌قیه‌كه ده‌رباره‌ی قوتابیێن قۆناغا ئێكێ دهێته‌كرن بۆ نموونه ئه‌ڤ ساله سمسته‌رێ ئێكێ به‌ره‌ف ته‌مام بوونێ یه و هنده‌ك قوتابی هه‌نه ده‌وام نه‌كریه ل قۆناغا ئێكێ، به‌لێ وه‌زاره‌ت پاره‌ی وه‌ردگریت ل سیسته‌مێ پاڕالێل بۆ زانكۆ په‌یمانگه‌هێن ئه‌هلی ژی ب هه‌مان شێوه‌یه، ئانكو قوتابی وه‌رزێ ئێكێ نه‌هاتیه زانكۆیێ، یان په‌یمانگه‌هێ، به‌لێ پارێ كریا خواندنێ ژ قوتابی دهێته‌كرن، ئه‌ڤه ژی غه‌دره ل قوتابی، له‌ورا پێدڤیه پێداچوون بهێته‌كرن بۆ ڤێ بڕیارێ و ئه‌و قوتابیێن گیروبووی بتنێ كریا ئێك وه‌رز ژێ بهێته وه‌رگرتن و وه‌رزێ ئێكێ بۆ نه‌هێته هژمارتن، چونكه د بنه‌ڕه‌تدا ئێك وه‌رز ده‌وامێ دكه‌ن بۆچی كریا هه‌ردو وه‌رزان بده‌ت زانكۆیێ، هه‌روه‌سا بۆ سالێن داهاتی پێداچوونه‌ك هه‌بیت سیسته‌مێ وه‌رگرتنا قوتابیان بهێته گۆهۆررین ب شێوه‌یه‌كی ده‌ستپێكا سالا نوویا خواندنێ قوتابی بهێنه وه‌رگرتن و ده‌ست ب ده‌وامێ بكه‌ن به‌رۆڤاژی ژلایێ زانستی ڤه قوتابی مه‌غدورن ژلایێ مادی ڤه پاره ژ قوتابی دهێته وه‌رگرتن.
