مامۆستایه‌كێ زانكۆیێ: نابیت ده‌واما زانكۆ په‌یمانگه‌هان وه‌ك سالا بۆری بیت
هه‌ولێر، قائید میرۆ
بڕیاره ده‌ستپێكا هه‌یڤا داهاتی سالا نوویا خواندنا زانكۆ په‌یمانگه‌هان بهێته ده‌ستپێكرن و مامۆستایه‌كێ زانكۆیێ ژی ئاماژه‌كر، پێدڤیه زیانێن دو سالێن بۆری بهێنه قه‌ره‌بووكرن و دبێژیت، پێدڤیه خواندنا بلند چاڤدێریا ده‌واما قوتابیان بكه‌ت و رێكێ نه‌ده‌ت وه‌كی دو سالێن بۆری قوتابی ب حه‌زا خۆ پێگیریێ ب خواندنێ بكه‌ن.
دكتۆر سادق حه‌مه غه‌ریب، مامۆستایێ زانكۆیێ بۆ رۆژناما ئه‌ڤرۆ دیاركر” دو سالێن بۆری كه‌رتێن په‌روه‌رده و خواندنا بلند زیانێن مه‌زن هه‌بووینه ژبه‌ر نه‌بوونا ده‌وامێ و به‌لافبوونا ڤایرۆسا كۆرۆنایێ، ئه‌ڤساله بڕیاره ده‌ستپێكا هه‌یڤا ئیلوونا داهاتی ده‌واما زانكۆ په‌یمانگه‌هان بهێته ده‌ستپێكرن بۆ سالا نوویا خواندنێ وه‌كی حوكمه‌تێ بڕیار لسه‌ردای، ئه‌ڤه‌ژی بڕیاره‌كا باشه بۆ سالانوویا خواندنێ، به‌لێ پێدڤیه قۆناغا ده‌ستپێكێ قوتابی و مامۆستا ڤاكسینا دژی كۆرۆنایێ بكار بینن هه‌تا كاریگه‌ریێن مه‌ترسیێن كۆرۆنایێ كێمتربن لسه‌ر قوتابی و مامۆستا، هه‌روه‌سا بزاف بهێنه‌كرن بشێوه‌یه‌كی زانستیێ رێكوپێك كار بۆ رێڤه‌برنا سالا نوویا خواندنێ بهێته‌كرن، هه‌تا كاریگه‌ریێن دو سالێن بۆری ژی بهێنه قه‌ره‌بووكرن، چونكه ب راستی دو سالێن بۆری ده‌واما تێكه‌ل ب هه‌ردو رێكێن ئه‌لكترۆنی و ناڤا كه‌مپێ چو مفایه‌كێ وه‌سا نه‌بوویه بۆ كه‌رتێ خواندنێ و قوتابی وه‌ك پێدڤی پێگیر نه‌بووینه، چونكه كێمترین پێگیری هه‌بوویه ب سیسته‌مێ نوو ئه‌ڤه‌ژی بۆیه ئه‌گه‌رێ زیان گه‌هاندنێ ب خواندنا دو سالێن بۆری.
دكتۆر سادق حه‌مه غه‌ریب گۆتژی” پێدڤیه ئه‌ڤساله حوكمه‌ت به‌رهه‌ڤیێن باشتر بكه‌ت بۆ خواندنا زانكۆ په‌یمانگه‌هان و خواندن بشێوه‌یێ راسته‌وخۆبیت دناڤا زانكۆ په‌یمانگه‌هان، ئه‌گه‌ر بهێت و خودێ نه‌كه‌ت كۆرۆناژی دژواربو گه‌هشته قۆناغا مه‌ترسیێ ئه‌ڤه دڤێت خواندنا ئه‌لكترۆنی بشێوه‌یه‌كی بهێته په‌یڕه‌وكرن وه‌كی سالێن بۆری نه‌بیت، قوتابی ب حه‌زا خۆ بچیته ده‌وامێ یان نه‌چیت، یانژی پێگیریێ ب سیسته‌مێ ئونلاین و ئه‌لكترۆنی نه‌كه‌ن، واته پێدڤیه قوتابی بهێنه نه‌چاركرن ده‌وامێ بكه‌ت و پێگیریێ ب سیسته‌مێ ئه‌لكترۆنی بكه‌ت، سیسته‌مێ نه‌هاتن بهێته بجه ئینان و هه‌ر قوتابیه‌كێ پێگیر نه‌بیت بهێته سزادان و چاڤدێری هه‌بیت، چونكه بێی به‌رهه‌ڤی و هه‌بوونا چاڤدێریه‌كا هویر سیسته‌مێ خواندنێ دێ شكستێ ئینیت و سه‌رناگریت، ئه‌ڤێ ره‌وشی كاره‌كێ وه‌سا كریه ئاستێ خواندنێ بشێوه‌یه‌كێ به‌رچاف داكه‌تیه و نابیت ره‌وشا خواندن بڤی شێوه‌یێ نوكه به‌رده‌وامبیت، چونكه دێ پاشه‌ڕۆژێ باجه‌كا مه‌زن ده‌ین، ل زۆربه‌یا ولاتێن جیهانێ سه‌ره‌ڕای هه‌بوونا ڤایرۆسا كۆرۆنایێ پێگیری هه‌بوویه ب خواندنێ ئه‌گه‌ر هه‌تا سیسته‌م ئونلاین و ئه‌لكترۆنی ژی بیت ئه‌ڤه دڤێت قوتابی یێ پێگیر بیت و نمره هه‌بیت، به‌رۆڤاژی قوتابیێ ئه‌زموونان نه‌كه‌ت و نمره وه‌ك پێدڤی نه‌بن نه‌هێته هژمارتن.
