مامۆستایێن بسپۆریا وان پەروەردە نەبیت دڤێت پشکداریێ د خۆلێن راھێنانێ دا بکەن
ئه‌ڤرۆ نيوز:
بەرپرسەکێ وەزارەتا پەروەردێ ئاشکرا کر کو ل گورەی فەرمانەکا پەروەردەیی دڤێت ھەر مامۆستایەکێ دەرچوویێ کۆلیژێن پەروەردە و بنیات نەبیت د وەرزێ ھاڤینێ دا پشکداریێ د خۆلا بلندکرنا شیانێن مامۆستایان دا بکەت و گۆت: “ئەڤ بریارە بێ جوداھی ژ ھەموو مامۆستایان دگریت”.
ئەحمەد گەل، رێڤەبەرێ گشتی ل وەزارەتا پەروەردێ بۆ رۆژناما ئەڤرۆ دیار کر کو سالانە پشتی ب دووماھی ھاتنا وەرزێ خواندنێ وەزارەتا پەروەردێ خۆلێن ھاڤینێ ھەنە بۆ بھێزکرنا شیانێن مامۆستا و ھەر سال ھژمارەکا بەرچاڤ یا مامۆستایان دھێنە ھنارتن بۆ ئەڤان خۆلێن ژلایێ وەزارەتا پەروەردێ ڤە دھێنە ڤەکرن، بێگومان ڤەکرنا خۆلێن شیانێن مامۆستایان مەرەم ژێ ئەوە ھەر مامۆستایەکێ دەرچوویێ کۆلیژێن بنیات نەبیت، واتە ل کۆلیژەکا دی دەرچووبیت و بسپۆریا وان مامۆستایی نەبیت، د وەرزێ ھاڤینێ دا پێدڤیە پشکداری خۆلێ ببن داکو شەھرەزایا پتر ل دۆر کەرتێ پەروەردێ و چاوانا گۆتنا وانێن قوتابخانێ پەیدابکەن”.
ناڤھاتی خویا کر کو خۆلێن شیاندنا مامۆستایان ھەموو مامۆستایان بێ جوداھی ڤەدگەریت و فەرمانا پەروەردێ ئەوە ھەر مامۆستایەکێ دەرچوویێ کۆلیژێن پەروەردە نەبیت دڤێت پشکداریێ د خۆلان دا بکەن، چونکی ل سالێن بۆری ژ ئەگەرێن ھژمارەکا زۆرا دەرچوویێن کۆلیژێن ئابووری و کۆلیژێن دی وەکو مامۆستا ھاتینە دامەزراندن و وەک مامۆستا ل قوتابخانێن بنەڕەتی و ئامادەیی دەست بکاربووینە، بەلێ بسپۆریا وان نینە ببنە مامۆستا ب پشکداریکرنێ د خۆلێن تایبەت دا دێ شیانێن وانا ھێنە بلندکرن.
