مامۆستایێن مە نەشیان ل گەل مە بهێن، چونكی مامۆستا بوون و ب چەك و ڕەخت ڤە پێشمەرگە بوون
دیدار: رەمەزان دەشتمری / زاخۆ
1 – 5
دژیانا پێشمەرگایەتیێ دا ب دیمەنێن ڕەخت و تڤەنگ ل ملان و جانتكێ نانی ل پشتێ ڤە و ساق و گوڕەیێن ڕیسی ل پیان ل ناڤ چول و چیان و كەلەمێ چاڤێ دوژمن و نەیاران شۆڕەش و خەبات و بەرخوەدان ل سەر ملێن ئەڤان قەهرەمانان دهاتە كرن. ودەسكەفتی وئازادیا ئەڤرو بەرهەمێ رەنج وخەباتا وان قهرەمانایە.
پێشمەرگەو وكادرێ دێرینی شۆڕشا 26ی گولانا پێشكەفتنخواز عەبدولعەزیز ئیسماعیل بۆ ڕۆژناما ئەڤرو دئاخڤیت و گوت: ئەز ل سالا 1962ی ل گوندێ چەم كویركی ژمالباتەكا هەژارو كورد پەروەر یا سەر ب ناحیا باتیفا هاتمە سەر دنیای، و ل سالا 1969ی بابی من ئەز دەینام بەر خواندنی و ل پولا ئێكێ بنەرەت ل قوتابخانا گوندێ بانكاژیری من خواند وقوتابخانە ب دوراتیا دو كیلومەتران ژ گوندێ مە دوربوو، و ب فرمانا شۆڕەشی هاتبوو ڤەكرن و سەردەم سەردەمی شۆڕەشا ئەیلولا مەزن بو ول سەرانسەری كوردستانی شەربو هەژاری یی ب سەر خەلكی دا گرتبو وترس وبرس وكوشتن ودەربەدەری تەڤلی هەڤبوون، ئها ل وان كاودانین دژوارو سرو سەرماو بەفر و بارانین زڤستانی بۆ ماوێ دوو سالان ئەز چووم قوتابخانی ل گوندی بانكا ژیری، بەلی پشتی وان دووسالان دەرگەهی قوتابخانی هاتە دائیخستن و زاروكین هەر حەفت گوندین (گەلیی بانكی- منین- بانكا ژوری- بانكا ژیری- چەم كویرك – باندرو- ئەڤله وپیربلا) هەمی ژخواندنی هاتنە بی بەهركرن، و ژنەونا قوتابخانی وحەژیكرنا من بۆ خواندنی بابی من ئەز برم گوندی دەركارعەجەم مالا خوشكا من وئەز ل گەل زارۆكین گوندی دوو سالین پولا چاری وپینجی چووم قوتابخانا گوندی نوردینا، چونكو ل دەركاری قوتابخانە نەبوو. پاشی ل پۆلا پێنجێ و شەشێ بنەرەت بابی من ئەز ڤەگوهاستم قوتابخانا گوندێ بوسەلێ كرم و خواندنا خوەقوناغا بنەرەت لگوندی بوسەلێ ل قوتابخانا گوڤكی من تەمام كر، وتاقیكرنین دوماهیا سالی یێن وەزاری پۆلا شەش ل سالا 1974ی ل سەردەمی گەرمیا شەری د ناڤبەرا رژیما ئیراقی كوردان دا مە ل گوندی كەشانی ئەنجام دان وژبەر سەلامەتیا قوتابیان و ژترسا فرۆكین ئیراقی كو روژانە بچری خەلكی بی گونەهی كوردستانی بومبە باران دكرن وتەرو حشك تیكدا دسۆتن بێی جوداهی، چونكی گوندی كەشانی جهەكی ئارام ودویر دەستی دوژمنی بوو، مامۆستایێن مە ل گەل مە بهێن هەم مامۆستا وهەم پێشمەرگەبوون و بچەك ورەخت ڤە ل هنداڤی سەرێ مەبوون، ل سە كەرتان ل هولین ئەزمونان وهندەك ژوان مامۆستایان هیشتا دژیانی دا ماینە، بەلی ب مخابنی ڤە ل6/3/1975 شۆڕەشا ئەیلۆلا مەزن تێكچوو كارەسات ونەهامەتین مەزن ل پاش خوە هێلان وكێشەیێن ئیراق وئیرانی یێت كەڤن هاتنە ئیكلاكرن، ل جەزائیری دناڤبەرا سەدامی دكتاتور وشاهێ گوڕبگوڕ و بناڤبژیوانیا سەروكێ جەزائیری هەواری بومەدیەنی ل سەرحسابا شۆڕەشا گەلی كورد ژبەر هندی رژیما بەعس دانپیدان ب برواناما دەرچوونامە نەكر، و دوبارە ئەم ڤەگەراندن پولا شەشی و تاقیكرنا وەزاری مە ل زاخۆ ل قوتابخانا زوزان كرو پشتی نسكوا سالا 1975ی ژ ترسا دوبارەبونا شۆڕەشی ل هەیڤا تەموزی رێككەفتی10 /7/1976ی رژیما بەعس ئەم ڤەگوهاستین و گوندین مە هەمی سۆتن وچول و ویرانكرن وئەم لگوندی دەركار عەجەم ئكنجی بین و قوناغا ناڤنجی هەرسی سالا ئەز ژگوندی دەركارعەجەم دچووم قوتابخانا گوندێ بێرسڤێ، چونكو ل وی سەردەمی ل ناحیا سندیا قوتابخانا ناڤنجی تەنها ل گوندی بیرسڤی هەبی دیسا تاقكرنین دوماهیا سالی وەزاری یین پۆلا سیی ناڤنجی مە ل قوتابخانا سەلاحەددین ل دهوكی كرن. و هەروەسا قوناغا ئامادەیی هەرسی سالا ئەز ژ دەركارعەجەم دچووم زاخۆ ئامادەیا بەدرخان وپشتی من قوناغا ئامادەی تەمام كرو برواناما بەكەلوریا وەرگرت ومن پێشكێشی زانكۆی كر، و ناڤی من ل زانكۆیا مۆسل پشكا زمانێ كوردی دەركەفت، و من هەیڤەكی دەوام كرو پشترا من قەستا ناڤ ڕێزێن شۆڕەشا 26ی گولانا پێشكەفتنخواز كر، و دەستدا چەكی بوو مە پێشمەرگە وبەردەوامی دا خزمەت و خەباتێ ل توخیبێ لقێ ئیك وژیانا شۆڕەشگیریی دەستپیكر تا سالا 2001ی.
كادرێ دێرین عەبدولعەزیز دەربارەی ڕێكخستنا نهێنی یا پارتی دیموكراتی كوردستان دبێژت: ل سالا 1976ی ل ئەوی دەمی ئەز دەرچووی قوناغا سەرەتای بیم. ل زقستانا وی سالی ل شەڤەكێ مامێ من رەحمەتی حەجی سالح باسێ هات مالا مە و گوت: دگەل من وەرە من كارەكی ب تە هەیی رەحمەتیا دایكا من گوت: حەجی سالح تە خیرە لڤێ نیڤ شەڤێ دی ل گەل خوە بی. خێرە تە چ كار پی هەیە ؟. مامێ من گوت: خوە نەترسینە وچ نینە من هندەك كار ل مالێ هەیە و دێ زوی زڤریت ڤە مال. ئەوبی ئەز ل گەل چووم دەمی ئەم ب ژوور كەتن من دیت دوو زەلامێن بچەك ل مالا مامێ من دڕوینشتی نە و من سلاڤی وان كر، و ئەز چوم دەستێ وان، من ئێك ژوان نیاسی ئەو ژی شەهید سەید حەسەن سەید مستەفا بی كو ل سەر دەمێ شۆڕەشا ئەیلولێ پیشمەرگە و ماموستایێ من بوو ل قوتابخانا بانكا ژیری. بەلێ ئەوێ دیتر سەر و چاڤێن وی د پێچایی بین ومن نەنیاسی. دەمێ ئەز ڕوینشتیم و خێرهاتن ب مە كر و خودێ ژێ ڕازی سەید حەسەنی گوتە من بخێرهاتی تو من دنیاسی؟ من گوت: بەلێ تو سەید حەسەنی و ماموستایێ منی كەیفا وی زور ب من هات و ئەز دام بەرسینگی خوە و ب سەری من ڤە ماچی كرو گوت تو زیرەكی. گوت ئەری تو بەردەوامی ل سەر خواندنی ؟ من گوتێ: بەلێ گوت هشیار بە نەهێلی، چونكو كەسی نەخواندەوار وەكی دارا بی بەرە. سەید حەسەنی گوت. ئەڤە مە دەست ب ڕیكخستنا پارتی كرەڤە ڤەو دوبارە دێ دەست ب شۆڕەشێ كەین و ئەڤە دەه كەس ل گوندێ وە دگەل مامێ تە حەجی سالح مە كرنە حزبی و مامێ تە بەرپرسی وانە و هەر ئیكی ناڤەكی نهینی بو هاتیە دانان، ئەگەر پوستەیەك هات دی بووان خوینی و ل سەر ناڤەڕوكا وێ دێ بەرسڤێ دەی . بەلێ هەمی تشت دی بنهینی بن. هەروەسا حەسەنی گوتەمن. باش هشیاربە و كەس تە ب سەردا نەبەت، چونكی موخبەرچی دزورن هەرگاڤا زانین ودی دەنگۆباسا گەهینن دوژمنی دی بیژن مخەرب وی هاتین دەڤەری ڤیجا تو ژی هشیاربە، ول دەف كەسەكی ڤە نەئاخڤە. من گوتێ مامۆستا پشتڕاستبە ئەزچ جاران ئەڤێ نهێنیێ ئاشكرا ناكم، هەڤالی وی گوت حەسەن پشتڕاست بە خوارزای من مەزبیتە وچ كاری وەسا ناكەت، ئها هوسا ئاخفتنا وی گۆمان ل دەف من چێكر كویی نیاسە ژبەر هندی سەرو چاڤین وی دگرتی نە، وپشتی كاری خوە ب دوماهی ئینان و خاتر خواستن و چوون، مامی من گوت تە ئەو ناسكر من گوتی نەخیر گوت ئەو محمد میرزا بوو نەدڤیا خوە ئاشكرا بكەت، ژ بەركو كارێ وان زور نهینی یە وكاری رێكخستنێ دكەن و ودەسپیكا شۆڕەشەكا نویە لەوا نەدشیت خوە ئاشكرا بكەت. وپاشی حەسەنی گوت ئەڤە دەهـ كەس ل گوندێ وە دگەل مامێ تە حەجی سالح هاتن ڕێكخستن و مامێ تە بەرپرسی وانە و هەر ئیكێ ناڤەكێ نهینی بو هاتیە دانان . ئەگەر پۆستەیەك هات دی بووان خوینی و بەرسڤێ دێ سەر ناڤەڕوكا ئەوێ پۆستی دێ بەلێ تو دێ بناڤێ نهێنی فریكی.. ئها هوسا ئاخفتنا وی گومان ل دەف من چیكر كوئەڤە كەسەكی نیاس و نێزیكی مەیە. ئەڤەو رێكخستنا نهینی پارتی دیموكراتی كوردستان ل گوندێن دەڤەرا مە دەستپیكرو بڤی شێوەی.
