مامۆستا هه‌موو رۆژێن سێشه‌مبی دشێن ڤاكسینێ ب دانن
ئه‌ڤرۆ:
ل دووڤ وێ راگه‌هاندنا هه‌ڤپشك یا وه‌زاره‌تا ساخله‌میێ و وه‌زاره‌تا په‌روه‌ردێ یێن حوكمه‌تا هه‌رێما كوردستانێ، مامۆستا دشێن هه‌موو رۆژێن سێشه‌مبی قه‌ستا سه‌نته‌رێن دانانا ڤاكسینێ بكه‌ن و ڤاكسینا دژی كۆرۆنایێ ب دانن.
هه‌ردو وه‌زاره‌تێن ساخله‌میێ و په‌روه‌ردێ د وێ راگه‌هاندنا هه‌ڤپشك دا ئاشكرا كریه كو پشتی گۆتوبێژان ل سه‌ر دانا ڤاكسینێ بۆ مامۆستایان ژلایێ هه‌ردو وه‌زاره‌تێن ساخله‌میی و په‌روه‌ردێ ڤه، بڕیار هاته‌دان ئه‌وله‌ویه‌ت بۆ مامۆستایان بیت بۆ وه‌رگرتنا ڤاكسینێ ل هه‌موو سه‌نته‌ر و دام و ده‌زگه‌هێن ساخله‌میێ و ل دووڤ سیسته‌مێ خوه تۆماركرنێ ل پۆرتالا (KURDVAC) یان پێگه‌هێ ئه‌لكترونی (https://vac.health.digital.gov.krd).
هه‌روه‌سا ئاماژه ب وێ چه‌ندێ ژی كریه، بۆ ڤێ مه‌ره‌مێ هه‌موو رۆژێن سێشه‌مبی د حه‌فتیێ دا دێ بۆ مامۆستایان بیت كو ڤاكسینا دژی كۆرۆنایێ وه‌ربگرن، ب مه‌رجه‌كی ناسنامه یان پشتگیریا قوتابخانێ د گه‌ل دا بیت.
