مانچستەر ستی ناسناڤێ ئێكێ یێ چامپیۆنزێ ب دەستڤە ئینا
ل دووماهیێ یانەیا مانچستەر ستی یا ئنگلتەرایێ گەهشتە هیڤییا خوە یا چەندین سالان و خەونا خوە ب جه ئینا پشتی شیایی ناسناڤێ قارەمانیا یانەیێن ئۆرۆپا قارەمانێن خولا چامپیۆنز لیگ ب دەستڤە بینت، ب سەركەفتی ل سەر هەڤڕكا خوە یانەیا ئەنتەر میلان یا ئیتالی ب گۆلەكێ بێی بەرانبەر، د یارییا وان یا دووماهیێ دا ئەوا ل شەڤا بۆری یاریگەها ئاتاتۆرك ل باژێرێ ئستەنبۆلا توركیا مێڤانداریا وێ كری، بڤێ ناسناڤی گۆاردیۆلایی سۆزا خوە بجه ئینا و سێ ناسناڤ د ئێك وەرز دا كۆمكرن ئەو ژی خولا پرێمەر لیگ، كۆپا ئنگلتەرا و چامپیۆنز لیگ ئەوا چەندین سالە ئەڤ یانە شەڕێ بوو دكەت.
نیڤا ئێكێ ب زاخەكا بلند یا یاریزانێن هەردو تیما دهاتە دیتن و گڤاشتنێن مەزن ل سەر گۆلا هەڤدو هەبوون تایبەت تیما مانچستەر ستی ئەوا زێدەتر خوە نێزكی گۆلا ئەنتەرێ دكر لێ ئەڤ نیڤە بێ گۆل ب دووماهی هات، د نیڤا دویێ دا ئاستێ یاریێ زێدەتر شاریا و بزاڤێن مەزن هەبوون هەتا خولەكا 68ێ یاریزانێ مانچستەر ستی یێ ئسپانی رۆدرێگۆ هێرناندێز مفا ژ تەپەكا ڤەگەڕیایی وەربگریت ب دووراتیا 15 یاردا گۆلا ئێكێ و دیرۆكی بۆ تیما خوە بینت و ناڤێ خوە ب زێری د دیرۆكا یانەیا خوە دا تۆماربكەت، پشتی ڤێ گۆلێ یاریزانێن ئەنتەر گڤاشتنێن خوە زێدەكرن و راهێنەرێ وێ سیمۆنی ئینزاكی چەند گوهۆڕین كرن بۆ راستڤەكرنا ئەنجامێ یاریێ، بەرانبەر دا راهێنەرێ مان ستی پیب گواردیۆلایێ پلانا خوە یا هێرشبرنێ نە گۆهارت بەلكو داخواز ژ یاریزانێن خوە دكر بەردەوامبن ل سەر گڤاشتنان و دروستكرنا هێرشان بكەن، د15 خولەكێن دووماهیێ دا ئەنتەرێ هەموو چەكێ خوە یێ گوهۆڕینا یاریزانان ب كار ئینا لێ چو ژ ئەنجامێ یاریێ نە هاتە گوهۆڕین ئەوا ب سەركەفتنا دیرۆكی و دەستڤە ئینانا ناسناڤێ چامپیۆنزێ بۆ مانچستەر ستی ب دووماهی هاتی.
ستێرێ مان ستی یێ نەرویجی ئیرلینگ هالاند ب تۆماركرنا 12 گۆلان ب ناسناڤێ گۆلكەرێ قارەمانیێ هاتە خەلاتكرن، هەروەسان قارەمانا چامپیۆنزێ ب 17 ملیۆن پاونێن ئسترالینی و تیما دویێ ب 13 ملیۆن پاونا هاتنە خەلاتكرن.
بۆ زانین یانەیا ریال مەدرید خودانا 14 ناسناڤێن چامپیۆنزێ یە، هەر ئێك ژ میلان حەفت ناسناڤ، بایرن میۆنخ و ئارسنال شەش ناسناڤان و بەرشەلۆنا پێنچ ناسناڤ، ئەیاكس چار، ئەنتەر میلان و مان یۆنایتد سێ ناسناڤ، چێلسی، پۆرتۆ، یۆڤانتۆس، نۆتینگهام و بەنڤیكا دو ناسناڤ، دەه یانەیێن دی ئێك ناسناڤ ئەوژی بۆرۆسیا دۆرتمۆند، مارسێلیاڤ، ئایندهۆڤن، هامبۆرگ، ئاستۆن ڤێلا، ستیۆ بۆخارێست، سێرڤینا زڤیزیدا، فاینۆر، سێلتیك و مانچستەر ستی.
