مایتێكرنێن ژ ده‌رڤه دبنه ئه‌گه‌رێ هه‌رفاندنا خێزانێ
ئه‌ڤرۆ نیۆز،زنار تۆڤى:
نابیت چ جاران ژن و مێر ئاخفتن و نهێنیێن خوه بۆ خه‌لكێ و ئه‌و كه‌سێن ل ده‌ردورا وان دژین بێژن،چونكى هه‌كه نهێنیێن وان هاتنه ئاشكراكرن و كه‌سێ سییێ ماتێكرن د ژیانا وان دا كر،ئه‌و خێزان دێ هه‌لوه‌شیت و ئێدى دێ یا ب زه‌حمه‌ت بیت كو جاره‌كادى ئه‌و خێزان ب شێت ب خۆشى و ئارامى ل گه‌ل ئێك ب ژین.
یوسف ئۆسمان ئه‌و ده‌روونناس و شاره‌زایێ جڤاكیه بۆ ئه‌ڤرۆ نیۆز دبێژیت:شاره‌زایێن جڤاكى و ده‌رونناسیێ دیار دكه‌ن،هه‌كه ته بڤێت تو دناڤ خێزانه‌كا به‌خته‌وه‌ر دا بژى و ئه‌و خێزان یا دوور بیت ژ كێشه‌یێن ڤه‌بر و یێن دوور و درێژ و بێ بنه‌ما،چ جاران نه‌هێله كه‌سێ سییێ مایتێكرنێ د ژیانا ته یا تایبه‌ت دا هه‌روه‌سا ژیانا ته یا هه‌ڤژینیێ ژى دا بكه‌ت،ئه‌و ژى دیاركر:ده‌مێ مرۆڤ هه‌ڤكارى و هه‌ڤالینیا كه‌سه‌كێ دكه‌ت،یان ژى ده‌مێ مرۆڤ به‌حسێ ژیانا خوه بۆ دكه‌ت،بلا هه‌موو هووربینیێن ژیانا خوه یا نهێنى بۆ وى كه‌سى به‌حس نه‌كه‌ت،له‌ورا پێدڤیه بتنێ وان خالان به‌حس بكه‌ى یێن كو ئه‌و كه‌سێ هه‌مبه‌رى ته تێ دگه‌هیت،ژ پێخه‌مه‌ت ئه‌و ژى رێنمایێن دروست بده‌ته ته،نه‌كو ده‌ست تێوه‌ردانێ د یاسایێن ژیانا ته و خێزانا ته دا بكه‌ت،چونكى پێكئینانا خێزانێ ئێك ژ پیرۆزیێن ژیانا مرۆڤیه و دڤێت مرۆڤ وێ پیرۆزیێ ب پارێزیت و هه‌روه‌سا نه‌هێلیت ده‌ستێ سییێ ب كه‌ڤیته دناڤدا،چونكى هاتنا كه‌سێ سییێ دناڤ خێزانێ دا دێ بیته ئه‌گه‌رێ هه‌رفاندنا وێ.
ژنه‌ك بناڤێ سوعاد محه‌مه‌د دبێژیت:گه‌له‌ك ژن هه‌نه نهێنیێن مالا خوه بۆ ئێكودۆ دبێژن و هه‌ست ب هندێ ناكه‌ن،كو ئه‌ڤه كاره‌كێ خه‌له‌ته ئه‌و دكه‌ن،ژبه‌ركو چێنابیت مرۆڤ نهێنیێن هه‌ڤژین و خێزانا خوه بۆ خه‌لكێ بیانى و هه‌روه‌سا خۆیانیان ژى بێژیت،چونكى ئه‌و دێ ده‌ستان ئێخنه ناڤ ژیانا مرۆڤى دا و دێ زیانێ گه‌هیننه مرۆڤى و گۆت ژى:زۆر جاران ژ ئه‌گه‌رێ گۆتنا نهێنیێن خێزانى چه‌ندین كه‌س توشى روودانێن ژێكجۆدابوونێ بووینه و ژیان ل به‌ر وان وه‌ك دۆزه‌خێ لێهاتیه،له‌ورا ئه‌ز ب ئه‌رك دبینم كو چێنابیت مرۆڤ نهێنیێن مالا خوه بۆ كه‌سه‌كێ بیژیت و نابیت مرۆڤ ده‌لیڤه بۆ خه‌لكێ چێكه‌ت،كو ده‌ستێ خوه بێخنه دناڤ ژیانا مرۆڤى و خێزانا مرۆڤى دا.
دلشاد عه‌لى وه‌لاتیه‌كه دبێژیت:پاراستنا نهێنیان ئه‌ركه ل سه‌ر ملێن ژن و مێران و دڤێت مرۆڤ ب ره‌نگه‌كێ ژیر و هشیارانه سه‌ره‌ده‌ریێ ل گه‌ل خێزانا خوه بكه‌ت و چ جاران ژێك توره نه‌بیت و نه‌هێلیت كیشێن دناڤ خێزانێ دا مه‌زن ببن و هه‌روه‌سا چ جاران نه‌هێلیت كێشه بگه‌هنه وى ئاستى كو كه‌سێ سییێ مایتێكرنێ د ژیانا مرۆڤى دا بكه‌ت،چونكى هه‌ر ده‌مێ هنده‌كان مایتێكرن د ژیانا مرۆڤى دا كر،چ ئه‌و كه‌س نێزیكى مرۆڤى بن،یان ژى هه‌ڤال و براده‌رێن مررۆڤى بن،ل وى ده‌مى دێ خێزانا مرۆڤى به‌ره‌ف هه‌لوه‌ریانێ ڤه چیت و گۆت ژى:لێ هه‌كه لێكتێگه‌هشتن هه‌بیت چ جاران ئاریشه دناڤبه‌را ژن و مێران دا روو ناده‌ن و هه‌رده‌م ئه‌و خێزان دێ ب خۆشى و ئارامى ژیت و چ جاران ده‌لیڤێ ژى ناده‌نه كه‌سێ كو مایتێكرنێ د ژیانا وان یا تایبه‌تى دا بكه‌ن.
