ما دێ هه‌ر بۆ هه‌وه یێ ساخ بم؟!
عارف حیتۆ
ئه‌زه‌كێ مشتی غروور و
دیوانه‌كا به‌نجكری یا ب مسك و بخوور
هه‌می كێلیكێن ژیانێ
من ژ خه‌مێ داقوتان و ژێ نژیار كر
به‌رسفكه‌كا ب خه‌نده و سروور
هه‌ر بشكوڕینا عه‌فه‌وی
د روویێ زیندانێ دا تفه‌نگ
ژێ دجنقن گول و كولیلكێن هه‌مه‌ڕه‌نگ
ئو ئادی یێن ل ده‌ر و ده‌ردۆر
باخچه‌یێن گه‌ش داگیركرن
هه‌می عه‌مرێ ئه‌ز ژێ وه‌ستیایی
من دانا به‌ر گرنژینێ و گولی دكرن
ب گولیێن گه‌نمی ڤه سه‌رخۆشم
ئو.. له‌شكرێ زه‌ینه‌فۆنی هات
ل به‌ر كه‌له‌كێن نه‌هه‌ڕفتی، حه‌ییری و مات
ما هه‌تا كه‌نگی، ئه‌ز هه‌ر بۆ هه‌وه دێ یێ ساخ بم؟!
كو ئاخا ته‌ر، ب نانی سۆتی نه فرۆشم!
ل ئاهه‌نگا سه‌ركه‌فتنێ
سه‌ربازه‌كێ ئێكانه‌یێ مشتی جۆش و ب خرۆشم
خۆشیه‌كا زۆر.. دادا بوو سه‌ر میرگه‌هێن دوور
كو حه‌زێن كه‌ل ب هیڤی یێن هه‌ل
به‌رده‌مه سه‌ر خه‌مێن نه‌گۆتی و دیتنا كوور
خالا گه‌هینێ ل به‌ر مه.. دبیته سنوور
لێ ژ نشكاڤه..
كه‌فتمه به‌ر ئزرائیلێ ژ ئاسمانێ ژۆر…
*
مه‌یگێر..
كا ژ كه‌ره‌مێ پێكی بینه ل به‌ر من بدانه
ئه‌ڤ مه‌یا تال راستیه‌كه و راستی هه‌رده‌م
ب تالیێ ڤه نیشانه
من كۆمه‌كا ژان و برینێن خوینه‌لۆ
ژ رێكا ره‌وان ڤه‌كرن و
كرنه پارسه‌ك ژبۆ ئایینده‌ی
من گلوازه‌ك خه‌ونێن مه‌ند بووی
ژ باغێ هه‌رمانێ كرن ب كێرێن ده‌ڤلۆ
ئو ب زانیبوون كرنه زه‌نگل د ستوویێ سه‌ی
ما نه ئایینده‌یه ژ ره‌هێن ئیرۆ شین دبیت؟!
مه‌یێ خه‌ون د مێشكێ ماندی دا جه‌ماندن
جیهانه‌كا جوان و خۆش دانا به‌ر پێ ئاشۆپه‌كێ و
ئاشۆپ فڕی
ل گه‌رمه‌گه‌رما فڕینێ و دودلیا وه‌هم و یه‌قینێ
ره‌هێن بنئاخا رپسی، ژ رپسینێ ڕزاندن
سه‌یێ من- ئه‌وێ زه‌نگله‌كا خه‌ونان د حه‌فكێ
ب له‌ییزتن به‌ر ب گورگان ڤه دبوو مه‌له‌ك
سوخته‌یێن زان و زانینێ ڤه‌چغاندن
رێكێن راست و نیشانكری
ل به‌ر منێ مه‌ست و سه‌رخۆش كرنه خه‌له‌ك
خه‌وێ خه‌ون هه‌لگرتن و
خوه ل سه‌ر چاڤێن من په‌حن كر
ئه‌ڤ پێكۆلا من یا دیتنێ
ژ كه‌ڤلكر و ب ئه‌نیا من ڤه كه‌ڤن كر
هه‌ر برینا مه‌ی نه‌شێتن بێژتێ وه‌له‌ك!
دێ د چاڤێن داكه‌فتی دا شین بیته‌ڤه و
وه‌ك بازنه‌ی..
ل دۆر خوه دزڤریت و دبیته چه‌رخ و فه‌له‌ك.
*
