مبەشەر حەسەن: ئوپوزسیون نەشیا ببیتە ئامرازەك بۆ بەرەڤ پێشڤەبرنا پروسا سیاسی و حوكومرانی ل كوردستانێ
ئەڤرۆ نیۆز ، رەمەزان هەرنی:
مبەشەر حەسەن حەدو چاڤدێرێ سیاسی ل كوردستانێ ددیدارەكێ دا بۆ ئەڤرۆ نیوز ل دور هەلبژارتنێن چاڤەرێ كری و رولێ ئوپوزوسیونێ ل ناڤا پەرلەمانێ كوردستانێ دیاركر .
ئەڤرۆ نیۆز : هەلبژاردنێن خولا نویا پەرلەمانێ كوردستانێ دێ ج گوهریت ل كوردستانێ ؟.
مبەشەر حەسەن : ژ رویێ ئاست و پێگەهێ پارتێن سیاسی دجڤاكەكا نەریتی دا وەك هەرێما كوردستانێ،زەحمەتە گورانكاریەكا دراماتیكی مەزن ل هژمارا كورسیان روو بدەت ، پێشبینی دهێتە كرن پارتی دیموكراتی كوردستان وەك ئالا هەلگرێ پرسا سەرخوە بوونێ و بەرگریكارا كیانێ فیدرالی هەرێما كوردستانێ ڕیژەیەكا باش یا كورسییان ب دەستڤەبینیت ، پرسا هەلبژارتنا وەك ئامرازەكێ گرنگێ دیموكراتیەتێ پرَوسەیەكێ ئەرێنی یە پێخەمەت پَیشڤە چوونا جڤاكێ، نوو بوو نەڤا پەرلەمان و حكومەتا كوردستانی َ و مفا وەرگرتن ژ رودان و سەر بورێن چەند سالێن بوری و هاتنە پێشا كەسانێن گەنج و خودان شیان كو دناڤ بەربژێراندابهێنە دیتن ، دێ فاكتەرێن ئەرێنی و ب هێز بن بۆ باشتر كرنا رەوشا سیاسی ئابووری و كێم كرنا ئاستێ گەندەلیێ.
ئەڤرۆ نیۆز : رەوشا ئابووری ل كوردستانێ پشتی هەلبژاردنا و كابینا نویا حكومەتێ دێ هێتە گوهرین ؟
مبەشەر حەسەن : ئابووریا كوردستانێ ب رێژەیەكا زور پشت بەستین ب پیشەسازیا نەفتێ كریە ،سێكتەرێن دی وەكی پێدڤی گرنگی پێ نەهاتیە دان ، ئەو كاودانین دژوار و نەخوش ل ساڵێن بووریدا ب ئەگەرێ قەیرانا ئابووری (برینا بودجەی ل بەغدا) و نزمبۆنا بهایێ نەفتێ ، ئەو باوەرە یا چێكری بۆ حكومەتا كوردستانێ و هێز و لایەنێن سیاسی كو دڤێت سێكتەرێن گەشت و گوزار و چاندنێ ژی بهێنە ڤەژاندن.
ئەڤرۆ نیۆز : پشكداری نەكرنا هندەك لایەنێن كوردستانێ ل هەلبژاردنا چۆ دگەهینیت ؟
مبەشەر حەسەن : ژبلی پارتی دیموكراتی كوردستان چۆ پارت و لایەنەكا سیاسی ل هەرێما كوردستانی د ناڤ خودا سەقامگیریەكا نینە و هەمی لایەنان ب نهێنی بزاڤ دكر كو هەلبژاردن بهێنە پاشخستن پارتی بویە ئەگەر هەلبژاردن بهێنە كرن ، پشكداری نەكرنا هندەك لایەنان ڤەدگەرێتەڤە بۆ وێ چەندێ كو ئەنجامێن هەلبژاردنێن (12/5) بۆ پەرلەمانێ عێراقێ دەركەفت كو سەنگا وان گەلەك كێمترە ژ وان پێشبینی و چاڤەرێ بوونا كو هەی.
ئەڤرۆ نیۆز : خولا نوو یا پەرلەمانێ كوردستانێ ئۆپوزسیون هەبیت باشترە یان نە بۆ كوردستانێ ؟.
مبەشەر حەسەن : هەبوونا ئوپوزسیونێ تشتەكێ ساخلەم و ئەرێنیە بۆ پروسا دیموكراتیەتێ ،مەرجەكێ كو ئوپوزسیونەكا ساخلەم بیت ،ل پرانیا وەلاتێن دیموكرات دا پروسا سیاسی و دیموكراتی زێدەتر وەك یاری و ب رێڤەدچیت كو بازنە و توخیبێن نەبەزاندی ل گوری یاسایێ هەنە و دهێنە رێكخستن ، مخابن سالانێن بوری ئوپوزسیون ل كوردستانێ نەشیا ببیتە ئامرازەك بۆ بەرەڤ پێش برنا پروسا سیاسی و حوكمرانی ل كوردستانێ ، بوقوتابخانەیەك بۆ چێكرنا ئالوزی و نەهێلانا پابەندییا نەتەوایەتی و نیشتمانی و بێ هیڤی كرنا تەخێن جڤاكێ ، هێز و لایەنێن سیاسی چ پشكدار بن د حكومەتێدا و چ ژی ئۆپوزسیون بن دڤێت رولەكێ ئەرێنی بگێرن د جڤاكێدا و بشێن ل راستا بەرژەوەندیێن گەلێ كوردستانێ كار بكەن.
