محه‌مه‌د ئاكره‌یی: ژ به‌ر نه‌بوونا پشته‌ڤانیێ ئاستێ هونه‌رێ كوردی پێش ناكه‌ڤیت
ئه‌ڤرۆ،ره‌مه‌زان زه‌كه‌ریا:
هونه‌رمه‌ند (محه‌مه‌د ئاكره‌یی) یێ به‌رنیاس ب (حه‌مودی) نوكه وه‌كو ئه‌ندازیارێ ده‌نگی كار دكه‌ت د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ ئاشكرا كر كو ستران و ده‌نگێن فۆلكۆر گه‌له‌ك جوداهی هه‌بوو دگه‌ل وان سترانێن نوكه دهێنه گۆتن و به‌لاڤكرن، سترانبَژێن گه‌نج نوكه ده‌نگێن وان دباشن، به‌لێ چو ماندوبوون یا پێڤه دیارنینه بله‌ز دهێنه تۆماركرن و به‌لاڤكرن له‌ورا ژی گه‌له‌ك نامینن و به‌رزه دبن ئه‌ڤ چه‌نده ژی دزڤریت بۆ په‌یڤ و ئاوازان سه‌ره‌رای ڤێ چه‌ندێ ژی ئه‌و به‌رهه‌مێن دهێنه به‌لاڤكرن گه‌له‌ك گرنگیێ ژ لایێ ده‌نگی ڤه دده‌ینێ لێ ب زۆر بۆ ده‌مێ ده‌هـ رۆژان دمینیت و دهێته گوهداریكرن و راسته‌وخوه به‌رزه دبیت.
ناڤهاتی گۆت: ئه‌گه‌رێ سه‌ره‌كی كۆ سترانێن سه‌رده‌م زوو به‌رزه دبن په‌یڤ و ئاوازن، ئاوازا به‌رێ گه‌له‌ك یا ده‌وله‌مه‌ند بوو، به‌لێ ئاوازا سه‌رده‌م ل وی ئاستی نینه گه‌له‌ك جاران ده‌مێ به‌رهه‌مه‌ك دهێته ستۆدیۆیێ ئه‌م ئاوازا د گوهۆڕین هه‌تا كو بشێین به‌لاڤكه‌ین.
محه‌مه‌دی دیار كر كو مۆزیكا بیانی گه‌له‌ك كارتێكرن ل سه‌ر مۆزیكا كوردی دروستكریه و زیانێن مه‌زن گه‌هاندینه مۆزیكێ، ژ به‌ر كو مۆزیكا كوردی گه‌له‌ك یا تایبه‌ته هنده‌ك مۆزیكژه‌ن و هونه‌رمه‌ند ژ به‌ر ڤیانێ بۆ مۆزیكا بیانی دگه‌ل مۆزیكا كوردی تێكه‌ل كریه و مۆزیكا كوردی نوكه ب تاما مۆزیكا بیانی تایبه‌ت توركی دهێنه گوهداریكرن و گۆت: “چو پشته‌ڤانیا هونه‌ری ناهێته كرن ژبلی ماددی مه‌عنه‌وی ژی گرنگه پشته‌ڤانیا هونه‌ری و مۆزیكا كوردی بهێته كرن بۆ وێ چه‌ندێ پتر پێشكه‌ڤیت، به‌لێ ده‌ما پشته‌ڤانیا هونه‌ری نه‌بیت هونه‌ر پێش ناكه‌ڤیت”.
ل دووماهیێ ناڤهاتی خویا كر كو وی كار بۆ گه‌له‌ك هونه‌رمه‌ندێن باشوورێ كوردستانێ و رۆژهه‌لاتی كوردستانێ كریه ل باشوور وه‌ك هونه‌رمه‌ندان عه‌بدولقه‌هار زاخۆیی و ده‌لال زاخۆیی چه‌ندین هونه‌رمه‌ندێن دی ل رۆژهه‌لات وه‌ك عه‌زیز وه‌یسی و چه‌ندین هونه‌رمه‌ندێن دی، ئه‌ڤ هونه‌رمه‌نده خودان ئه‌زموونن د بوارێ سترانگوتنێ دا.
