محه‌مه‌د ئه‌لنه‌جار: یاریزانێن هه‌رێمێ دێ هێزه‌كا دی ده‌نه هه‌لبژارتیێ ئیراقێ
ئه‌ڤرۆ، قه‌یس وه‌یس
پشتی بۆ ماوێ هه‌یڤه‌ك و نیڤا لبن تاقیكرنێن ژێگرتنا باشترین یاریزانا بۆ ناڤ پێكهاتیێ هه‌لبژارتیێ ئیراقێ یێ یاریا باسكێت بۆلێ ب فه‌رمی سێ یاریزانێن هه‌رێما كوردستانێ بۆ پێكهاتیێ وان هاتینه داخوازكرن ل گه‌ل هه‌لبژارتیێ ئیراقێ به‌ره ب وه‌لاتێ ئۆردن ڕێكه‌فتینه ژبۆ پشكداریێ د كه‌مپێ راهێنانێ دا خوه به‌رهه‌ڤكرن بۆ ڤاڤارتنێن ده‌ربازبوونێ بۆ قاره‌مانیا ئاسیا یا 2025ێ.
هه‌ر سێ یاریزان ئه‌وژی فه‌رید ره‌عدی و موراد عه‌لی ژ پارێزگه‌ها دهۆكێ و محه‌مه‌د عه‌بدولخالق ژ هه‌ولێرا پایته‌خت دناڤ پێَكهاتیێ تیمێ دا نه.
لدۆر ڤێ یه‌كێ محه‌مه‌د ئه‌لنه‌جار راهێنه‌رێ هه‌لبژارتیێ ئیراقێ د داخویانیه‌كێ دا بۆ ئه‌ڤرۆ گۆت: بۆ ماوێ هه‌یڤه‌ك و دو حه‌فتیا د تاقیكرنێن ژێگرتنا یاریزانان و كه‌مپێن به‌غدا و دهۆكێ ئه‌م شیاین 12 یاریزانێن باش بۆ ناڤ پێكهاتیێ تیما خوه ده‌ستنیشان بكه‌ین خوه به‌رهه‌ڤكرن بۆ هه‌ردو یاریێن چاره‌نڤیس یێن ده‌ربازبوونێ بۆ قاره‌مانیا ئاسیا یا 2025ێ كو بڕیاره ل ده‌ستپێكا هه‌یڤا بهێت گه‌ل هه‌ر ئێك ژ هه‌لبژارتیێ كوێت و فه‌له‌ستین خودانا ئه‌رد و جه‌ماوه‌رێ وێ بكه‌ین، له‌ورا به‌رهه‌ڤیێن باش دهێنه كرن و دووماهی به‌رهه‌ڤی نوكه د كه‌مپه‌كێ راهێنانێ داینه ل ئۆردن به‌ری به‌ره ب وه‌لاتێ فه‌له‌ستینێ بچین.
ژلایه‌كێ دووڤه ناڤهاتی گۆت: هه‌بوونا سێ یاریزانێن هه‌رێمێ دێ هێزه‌كا باش ده‌ته تیمێ و ئه‌و یاریزان خودان شیانن و هونه‌رێ یاریێ دا د شاره‌زانه دێ پشتبه‌ستن ل سه‌ر وان هێته كرن و هه‌كه د باش نه‌بان نوكه د ناڤ رێزێن هه‌لبژارتیێ ئیراقێ دا پشكدار نه دبوون، له‌ورا مه باوه‌ری ب وان و هه‌موو یاریزانان هه‌یه دێ پلێتا ده‌ربازبوونێ ده‌ستخوه‌ڤه ئینن.
