(( محه‌مه‌د حه‌سه‌نێن هه‌یكه‌ل))
شێخ و مورید و ده‌روێش و هزرمه‌ند و بانگخواز و به‌ره‌ڤانكارێ هزر و فه‌لسه‌فه و ته‌ریقه‌تا ناسری ل مسرێ, به‌لكی ل جیهانا عه‌ره‌بی هه‌میێ، نڤیسه‌ر و رۆژنامه‌ڤانه‌كێ ناسیونالیزمێ ناڤدارێ عه‌ره‌ب، وه‌زیر و راوێژكار و شیره‌تمه‌ندێ سه‌روَكایه‌تی و كه‌سایه‌تیه‌كێ كاریگه‌ر ل سه‌ر سیاسه‌تا مسرێ نه‌خاسمه د ده‌وروزه‌مانێن جه‌مال عبدالناسریدا، بچیكترین سه‌رنڤیسه‌رێ رۆژناما الاهرام بۆ یا به‌ربڵاڤ و به‌رنیاس د ووڵاتێن عه‌ره‌بیدا. خودانێ گه‌له‌ك هزر و بۆچوون و میتوَدێن سوَسیالیزما عه‌ره‌بی و ب ئاشكرا و ل سه‌رڤه هه‌لگر و لایه‌نگرێ ئاڵا و درووشمێن كوَنگره‌ێن وه‌ڵاتێن بێ لایه‌نێن جیهانی بوو، لێ به‌لێ د كارێ نه‌په‌نی دا دوَست و لایه‌نگر و پشته‌ڤانێ سوَڤیه‌ت و كرێملێنێ بوو، هه‌رده‌م خوه ب ده‌یندارێ ماركسیزمێ دزانی. (هه‌یكه‌ل) ی به‌ری گرێدان و داخویانیا كوَنگرا (باندوَنگ) ێ ل ساڵا 1955 ێ، مه‌زنترین هه‌وا راگه‌هاندنێ لسه‌ر ئاستێ جیهانی بو هزرێن (نه‌هروَ و ناسر و تیتوَ) ی ئه‌نجامددان و مل ب ملێ سه‌روَك عه‌بدولناسری چه‌ندین سه‌ره‌دان و گه‌ریانێن مێكوكی كرن و درێكا كونگره‌ێن رۆژنامه‌ڤانی و چاڤپێكه‌فتن و دیدارێن راگه‌هاندنێ دا په‌یاما حكومه‌تا مسرێ و ئایدیوَلوژییه‌تا ناسری به‌ڵاڤ دكر، هه‌روه‌سا هه‌ر د بن سیبه‌را كارێ رۆژنامه‌ڤانیێ و لدوف رێپێدانا سه‌روَك عه‌بدولناسری كاری روَله‌كێ گرنگ د كوَنگره‌یا دامه‌زراندنا ده‌وله‌تێن بێ لایه‌ن كو ل (بلگراد) ێ ساڵا 1961 هات به‌رهه‌ڤكرن بگێریت. راستی ئه‌و ل ده‌سپێكا شوَره‌شا مسرێ نه‌هندێ نێزیك بوو لسه‌ركردایه‌تیێ و چ په‌یوه‌ندی ژی ب ئه‌فسه‌رێن رزگاریخواز ڤه نه‌بوون، به‌لێ پشتی سه‌ركه‌فتنا شوَره‌شێ نه‌تنێ شیا خوه نێزیكی ناسری كر به‌لكی بو پشكداره‌كێ هه‌ره‌گرنگ د نه‌خشه‌كێشان سیاسه‌تا قاهیره ل سه‌ر ته‌ڤایا ئاستێن حوكمرانیێ. ئه‌و نها د ژیێ پیری و كالیێ دایه (92) ساڵه، نێزیكه دێ چاخه‌كێ بۆرینیت، ئه‌و ب ڤی ره‌نگی به‌حسێ ژڤانا خوه (بارزانی) یێ نه‌مر دكه‌ت: ((به‌ری چه‌ند ساڵه‌كا، د ده‌مه‌كێ دا من دخواست وی ببینم، رێكا دیتنا وی یا دوورو درازو مه‌ترسیداربوو، ل دووڤ رێنمایا پێدڤی بو بچمه (ڤیه‌نا) پایته‌ختێ (نه‌مسا) و ل وێرێ ژی بكه‌ڤمه بن چاڤدێرێن نوونه‌رێن وی و ئه‌و من بره‌ڤینن بوَ كوردستانێ، داكو ل گونده‌كێ ل گوندێن چیاێن كوردستانێ (مسته‌فا بارزانی) سه‌ركردێ شوَره‌شا كوردان ببینم، لێ به‌لێ ل دووماهیێ من ب كورترین و ئێمناهیترین رێك دیدار دگه‌ل كر)). وه‌سا دیاره (هه‌یكه‌ل) د قووناغێن دووماهیا ژیێ خوه دا نه‌شیایه گوهۆرین و گوهۆرینكاریێن هزاره‌یا سێهه‌م قه‌بوول بكه‌ت و ب حه‌لینیت، نه‌خاسمه ده‌رهه‌قی مه كوردان، ئه‌و دژایه‌تیه‌كا سۆر و سۆر یا هه‌لوه‌شاندن و كه‌ڤناربوونا په‌یمانناما (سایكس پیكوَ) دكه‌ت و تا نهاژی د خوازیت گه‌ل و نه‌ته‌وه و میلله‌تێن ده‌ڤه‌را رۆژهه‌ڵاتا ناڤین لبن سیبه‌را حوكمرانیا دیكتاتوَرییه‌تا تاك حزب و تاك كه‌سیدا بژین، ئه‌و نكاریت جیۆپوَله‌تیكه‌كا نو ل ده‌ڤه‌رێ بخوینیت، له‌وا پارێزگه‌هه‌كا كوردی (كه‌ركووك) و ده‌وله‌ته‌كا عه‌ره‌بیا خودان سه‌روه‌ری (كوێت) وه‌كهه‌ڤ دبینیت. شاشی و پێشبینیێن ( هه‌یكه‌ل) ی رۆژ بو رۆژێ مشه دبن، چونكی وه‌سا دخه‌ملاند كو به‌ری دووماهی هاتنا ساڵا 2014 ێ هه‌رێما كوردستانێ تووشی شكه‌ست و هه‌رفینه‌كا ئابووری دهێت و هێزا پێشمه‌رگه ژی یا لاوازه و ل بن سیبه‌را سه‌ركردایه‌تیا ماڵباتاندایه و د ئێكه‌مین شه‌ر دا دێ هه‌لوه‌ریت. . !! ئه‌م به‌رسڤا ئه‌ڤێ شاشیێ دێ هێلین بو سه‌روَك وه‌زیر و وه‌زیرێن ده‌رڤه و مه‌زنه قوماندارێن له‌شكری و باڵوێزێن جیهانیی و كه‌سایه‌تیێن نه‌ته‌وه‌ێن ئێكگرتی و كوَمه‌ڵه و رێكخراوێن فه‌رمیێن مروَڤ دوَست، ئه‌وێن شه‌ڤ و رۆژ ناهێلن (هه‌ڤلێر) ا پایته‌خت و فروَكه‌خانا وێ ڤاڵا ببیت، دێ هێلین بۆ خوین و قوربانی و شه‌هیدێن پێشمه‌رگه و شه‌رڤان و گه‌ریلا و له‌شكرێ هه‌رچار پارچێ كوردستانێ. (هه‌یكه‌ل) ی ب خوه نڤیسیه كو سه‌روَك جه‌مال عه‌بدولناسری ده‌رهه‌ق ب (بارزانی مسته‌فا) گوَتیه ((زعیم اجتمع فیه القدیم و الحدیپ وهو متفان من اجل شعبه)).
