محه‌مه‌د شیاع سودانی:د زووترین ده‌مدا دێ كابینه‌یا نوو یا حوكمه‌تا ئیراقێ پێكئینم
ئه‌ڤرۆ:
سه‌رۆك وه‌زیرێن راسپاردی بۆ پێكئینانا كابینه‌یا نوو یا حوكمه‌تا ئیراقێ راگه‌هاند، د زووترین ده‌مدا دێ پێكهاته‌یا كابینا خوه پێشكێشی جڤاتا نوونه‌رێن ئیراقێ كه‌ت ب مه‌ره‌ما وه‌رگرتنا باوه‌ریێ.
پشتی هه‌لبژارتنا له‌تیف ره‌شید بۆ پۆستێ سه‌رۆك كۆمارا ئیراقێ، محه‌مه‌د شیاع سودانی، به‌ربژارێ ئالیێن چارچۆڤه‌یێ هه‌ماهه‌نگیێ بۆ پێكئینانا كابینه‌یا نوو یا حوكمه‌تا ئیراقێ راسپارد.
راسپاردنا سودانی، پشتی رێوره‌سمێن سویند خوارنا سه‌رۆك كۆمارا ئیراقێ یێ هه‌لبژارتی هات ل جڤاتا نوونه‌رێن ئیراقێ، ب به‌رهه‌ڤبوونا سه‌رۆكێ جڤاتا دادوه‌ری ل ئیراقێ و هه‌ژماره‌كا سه‌ركرده‌یێن ئالیێن سیاسی.
پشتی راسپاردنا وی، د داخۆیانیه‌كێدا سودانی ئاماژه‌كر كو دێ ل گه‌ل هه‌موو ئالیێن سیاسی كاردكه‌ت بۆ وێ چه‌ندێ د زووترین ده‌مدا پێكهاته‌یا كابینه‌یا حوكمه‌تا نوو یا ئیراقێ پێشكێشی جڤاتا نوونه‌رێن ئیراقێ بكه‌ت ب مه‌ره‌ما وه‌رگرتنا باوه‌ریا په‌رله‌مانتاران.
سه‌رۆك وه‌زیرێن راسپاردی دووپاتی ل وێ چه‌ندێ ژی كر كو دێ هه‌موو شیانێن خوه بكارئینیت بۆ پێكئینانا حوكمه‌ته‌كا نیشتمانی یا خزمه‌تگوزار كو ل ئاستێ چاڤه‌ڕێیا هه‌موویان دابیت و شه‌رمزار نه‌بن ل به‌رانبه‌ر گه‌لێ ئیراقێ.
