محەمەد تەیب بەری وەغەرکرنێ بۆ ئەڤرۆ چ گۆتبوو؟
ئەڤرۆ نیوز:
ھونەرمەندێ ناڤدارێ کورد محەمەد تەیب تاھر، ددیارەکێ دا بەری وەغەرکرنێ بۆ رۆژناما ئەڤرۆ دیارکر بوو، کو پتری سیە سالا ل وەلاتێ ئەلمانیا بوویە، و گۆت: ئەز گەلەک مامە ل ئەلمانیا رۆژئاڤا بەلێ ژبەر کاودانێن من ڤیزە نەدا من، لەورا ئەز نەچاربووم قەستا ئەلمانیا رۆژھەلات بکەم و پشتی ھەموو بەلگەنامە من پێشکێش کرین د شازدە رۆژان دا من ڤیزە ب دەستخوەڤە ئینا.
ھەوروەسا دیارکر، چوونا وی ژبەر کارۆبارێن سیاسی بوویە، لەورا ژی ئەوی کارێ سیاسەتێ ژدەرڤەی وەلاتی ژی کریە، و گۆت:چەند سالا ئەز بەرپرسێ رێکخستنا پارتی بوویمە ل ئەلمانیا.
ھەروەسا دیارکر، د ئاھەنگەکا مەزن دا ل وەلاتێ ئیسرائیلێ ب پشکداریا ھژمارەکا ھونەرمەندێن جیھانی وەک ( مایکل جاکسون) دکتورا فەخری ب موسیقێ پێ ھاتە بەخشین، و گۆت: ژبەر وێ یەکێ ئەوی رەگەزناما ئیسرائیلی ژی ب دەست خوەڤە ئینا.
ھەروەسا گۆت: ئەوی دو بەرھەم ھەنە کو پێک دھێن ژ 20 تراکان و ھەموو ئاوازێن وان بەرھەڤکرینە، بەلێ ژبەر دەستکورتیێ نەشایە بەلاڤ بکەت.
دەربارەی خێزانا خوە ژی دیارکر، کورەکێ وی پارێزەرە و ئێک ژی پشتی دو سالێن خواندنێ شیا ئێکەم ل کولیژێ دەربچیت و ببیتە بسپۆرێ ئامادەکرنا خوارنێ و یێن دیتر باوەرنامێن دبلومێ ھەنە.
ھەروەسا دیارکر وی 12 ستران ل رادیۆیا کوردی ل بەغدا بەرھەمئیناینە و ژبەر کاودانان نەشیا بەردەوامیێ بدەتێ.
