مخابن مووچه ببیته نووچه
بێگومان هه‌ر بزاڤه‌كا مرۆڤ دكه‌ت ل هه‌مبه‌ری تشته‌كی یه و ده‌مێ مرۆڤی هنده‌ك ئه‌رك هه‌بن، گومان نینه هه‌مبه‌ری وان ئه‌ركان هنده‌ك ماف هه‌نه، ئه‌ڤجا نه‌تشته‌كێ سه‌یره مرۆڤه‌ك كاره‌كی بكه‌ت و هه‌مبه‌ری وی كاری تشته‌كی وه‌رگریت، بۆ نموونه ده‌مێ كرێكاره‌ك ل جهه‌كی كار دكه‌ت هه‌رده‌مێ كارێ وی ب دووماهی هات خودانێ كاری دێ حه‌قێ ماندیبوونا وی ده‌تێ، ئه‌ڤجا كار هه‌یه رۆژانه‌یه و دێ پارێ وی ده‌یێ و هه‌یه حه‌فتیانه و هه‌یه ژی مه‌هانه، ئانكو مافه‌كێ ره‌وایه ده‌مێ كار ب دووماهی دهێت حه‌قێ ماندیبوونا خوه وه‌رگرن، له‌ورا دبێژم دانا حه‌قێ ماندیبوونێ نه تشته‌كێ سه‌یره.
هه‌كه بهێم و ل سه‌ر كاكلا بابه‌تێ خوه باخڤم، ئه‌م هه‌می دزانین كو پتره ژ ساله‌كێ حوكمه‌تا فیدرال هه‌رێما كوردستانێ خستیه د قه‌یرانه‌كا ئالۆز دا كو بۆدجا هه‌رێمێ ژێ بڕیه، له‌ورا هه‌ر سێ مه‌هان، یان چار مه‌هان جاره‌كێ مووچێن كارمه‌ند و فه‌رمانبه‌ران دهێنه دان و ب درێژیا وان سێ چار مه‌هان كانێ چه‌وا زارۆیێ ژنه‌كێ د لاندكێ دا دكه‌ته گری و هه‌ر ده‌یكا وی دبێژیتێ ((ئه‌ڤه هاتم دایێ هاتم، یان دێ بێژیت ئاها خلاس ئه‌ڤه هاتمه كورێ خوه)) ئه‌م سازیێن راگه‌هاندنێ ده‌رمانێن ئارامكه‌ر دده‌ینه خه‌لكێ خوه و جار دبێژینێ دو مووچه پێكڤه دێ هێنه دان! یان د مه‌هه‌كێ دا دێ سێ مووچه هێنه دان! بێگومان رۆژنامه‌ڤان و سازیێن راگه‌هاندنێ ڤان نووچان ژ به‌ریكا خوه نائیننه ده‌رێ، به‌لكو كه‌سایه‌تی و ئالیێن په‌یوه‌ندیدارن ڤان جۆره داخویانیان دده‌نه سازیێن راگه‌هاندنێ، ئه‌ڤه ژ ئالیه‌كی ڤه و ژ ئالیێ دن ڤه ده‌مێ مووچه دهێن، هاتنا مووچان دبیته مانشێتێن زیق یێن نووچێن رۆژنامه و كه‌نالێن مه، ئه‌و ژی به‌س نینه، به‌لكو هاتنا مووچان دبیته نووچه‌یێن ب له‌ز و دێ بینی (به په‌له) یه‌ك هاته خوارێ! مرۆڤ دێ هزر كه‌ت كانێ چ ل به‌رۆكێن شه‌ڕی روو دایه؟! بۆ نموونه دێ بینی نڤیسیه (مووچێن فلان وه‌زاره‌تێ سوباهی دێ هێنه به‌لاڤكرن!).
ئه‌ڤجا وه‌كی مه ل سه‌ری ژی ئاماژه پێ كری كو ده‌مێ كرێكاره‌ك ژ سپێدێ دچیت كاری بۆ ئێكی دكه‌ت ده‌مێ دبیته ئێڤار خودانێ كاری ئێسكه‌ر كرێیا وی دده‌تێ، پێغه‌مبه‌رێ مه ژی سلاڤێن خودێ ل سه‌ر بن دبێژیت به‌ری خوها ئه‌وێ بۆ ته كاری دكه‌ت هشك ببیت، پێدڤیه تو پارێ وی بده‌یێ، ئه‌ڤجا كارمه‌ند و فه‌رمانبه‌ر ژی هه‌ر وه‌كو كاره‌كی بۆ خودان كاره‌كی دكه‌ن پێدڤیه ل ده‌مێ پێدڤی پارێ خوه وه‌ربگرن كو ب ئاوایێ مه‌هانه‌یه، ل ڤێرێ چه‌ند پرسیار خوه دئازرینن، ئه‌رێ ئه‌گه‌ر ئه‌ڤه مافه‌كێ ره‌وا بیت بۆچی ده‌مێ دهێت ببیته نووچه؟ ئه‌گه‌ر تشته‌كێ ره‌وا بیت بۆچی راستی ناهێته گۆتن؟ هه‌روه‌سا بۆچی ئالیێن نه په‌یوه‌ندیدار دێ داخویانیان ل سه‌ر هاتن و دانا مووچان ده‌ن؟ دیسا ئه‌گه‌ر ئالیێن نه‌په‌یوه‌ندیدار داخویانیان ل سه‌ر ره‌وشا مووچان دده‌ن بۆچی لێپرسین ل گه‌ل ناهێته‌كرن؟ بۆ نموونه ئالۆزی و هاتن و نه‌هاتن و گیربوونا مووچه‌ی گرێدایی حوكمه‌تێ و وه‌زاره‌ته‌كێ ڤه‌یه، بۆچی په‌رله‌مانتاره‌ك دێ دخویانیه‌كێ ل سه‌ر ده‌ت؟! چونكی گه‌له‌ك جاران كه‌سه‌كی داخویانیه‌ك دایه و رۆژا دی كه‌سه‌كێ دی ئه‌و نووچه ره‌ت كریه! باشه ئه‌ڤه گونه‌ها كێ یه؟.
هه‌ژیه بێژم ل ڤێ دووماهیێ بریار هاته دان كو هاتنا مووچان نه‌بیته نووچێن سازیێن راگه‌هاندنێ، لێ هه‌ر دیسا دبیته نووچه! ره‌نگه ئێك بێژیت بلا سازیێن راگه‌هاندنێ نه‌كه‌نه نووچه! لێ ب دیتنا من ده‌مێ سازیێن راگه‌هاندنێ داخوازا داخویانیه‌كێ ل دۆر مووچان دكه‌ن پێدڤیه ئالیێن دی داخویانیان نه‌ده‌ن.
ل دووماهیێ دبێژم پێدڤیه نێزیكبوونه‌ك د ناڤبه‌را ده‌ستهه‌لاتێ و خه‌لكی دا هه‌بیت و نێزیكبوون ب تنێ به‌س نینه، به‌لكو پێدڤیه راستیه‌ك د ناڤبه‌را هه‌ردو ئالیان دا هه‌بیت، هه‌روه‌سا دبێژم هه‌تا كه‌نگی مووچه دێ بیته نووچه؟!.
