مرن د رویپا ژڤانان دا
محسن قۆچان
ل ژڤانێ تە
د ناڤبەرا منارە و گومبەتان دا
رویڤییەكی ناسناما من یا كڕاندی
ئەڤ ژڤانە سترانەكا نیڤەروویە
د گەوریا زارۆكینیێ دا ئاسێ بووی
هێز نەمایە ژ پراسیێن كەڤران دەركەڤیت
ل دویف بەزینا ناسناما من
ل بەر تەرگێ
ل سەر بەرمایكێن حەزێن پویتی
كیڤی دچەرن
تە ب خۆ جارەكێ گوتبوو من
مژیل نەبە
چ جار گارەی بهاڤ نینە سحبەتێ دگەل سپنەی بكەت
یان ژ هێرەشا تەرگێ برەڤیت
لەوما سپنە هەرێ زیزە
بەرەڤ دەریایێ برێدكەڤیت
هێژ گەلەك زوی من كاروان ب حەزان دكر
من حەز دكرین و دفرۆتن
گەلەك زویبوو
بایێ بەفرێ
چڕەك ل گرێژا حەزان دای
دبن كێلەكا هوڕەبای دا
حەز د دۆتن
دەمێ دبۆریت
دەم قەدەكا نەهشیێ یە
مە سەردا دبەت
ژینێ دكێلیت
چەند پیەكێ پێشدا دچیت
تۆزا مرنێ ل پاش خۆ دهێلیت
دناڤبەرا مزگەفتان و كنیشتان دا
ناڤێ منێ ژ ناسناما من وەریای
ئەز یێ ل ناڤێ خۆ بەرزەبوویم
ئەگەر سپنەی ناڤێ یارێ خۆ زانیبا
بێی دو دلی
دا هاری من، ل من گەڕیت
رۆندكێن شێلی نە دبوون خێلی
داجارەكی ل گەراڤكین سپنەی ڤەگەریت
ما كی دشێتن ئەوان سالان بهەژمێریتن
هەكو سپنە كچەكا جوان و گارەیێ هشك ژڤان ددانێ؟
لەو هەژاری ئاتافەكە و هەژار كرمن بۆ پێلێنانێ
دەروێشێن ژار دەفك لێدان
قەشا و مەلا زەنگل لێدان
بانگ هەلدێران
نڤشتی بەردان ب ئاڤێدا
ئو هەر گارە هشیار نەبوو، ما بەنجكری
ئەگەر گارە هشیار ببا
دا ئەو كەڤرێ ژ دلۆڤانیێ ڤالاكری
بنە هری
دا دندكێن هەلهەكۆكان ب لێڤێن یارا خۆ وەركەتن
دا هاویش كەت، نە دكر گری
ئەگەر گارە ب پیان چووبا
دا بەلی بیت
جوانترین سێڤن د هەبوونێ دا مەمكێن تەنە
رتما شعرا من شاش كری
وەلێ گارە نەخشێ تۆربێن كاروانیانە یێ تژی خەم
ل دوورێن وی
چاڤێن كوردان
فندێن شەڤێن خەنایێ نە خۆ كریە چەم
لەو شعرا من یا بێ رتمە، یا مایە كەم
لژڤانێ تە ئەز نە ئەزم
ئەز بەفرەكا بوهژی مە و بێ ناسنامە
ئەز هەلمەكم
من دخۆتن دەم.
٥\١١\٢٠٢٤
