مرن د ڕیپا ژڤانان دا
محسن قۆچان
ل ژڤانێ تە
د ناڤبەرا منارە و گومبەتان دا
رویڤییەکی ناسنامەیا من یا کڕاندی
ئەڤ ژڤانە سترانەکا نیڤەرۆیە
د گەوریا زارۆکینیێ دا ئاسێ بووی
هێز نەمایە ژ پراسیێن کەڤران دەرکەڤیت
ل دویف بەزینا ناسناما من
ل بەر تەرگێ
ل سەر بەرمایکێن حەزێن پویتی
کویڤی دچەرن
تە ب خۆ جارەکێ گۆتبوو من
مژویل نەبە
چ جار گارەی بها نینە سحبەتێ دگەل سپنەی بکەت
یان ژ هێرەشا تەرگێ برەڤیت
لەوما سپنە هەرێ زیزە
بەرەڤ دەریایێ ب رێدکەڤیت
هێژ گەلەک زوی من کاروان ب حەزان دکر
من حەز دکڕین و دفرۆتن
گەلەک زویبوو
بایێ بەفرێ
چڕەک ل گرێژا حەزان دای
دبن کێلەکا هوڕەبای دا
حەز ددۆتن
دەمێ دبۆریت
دەم قەدەکا نەهشیێ یە
مە سەردا دبەت
ژینێ دکێلیت
چەند پییەکێ پێشدا دچیت
تۆزا مرنێ ل پاش خۆ دهێلیت
دناڤبەرا مزگەفتان و کنیشتان دا
ناڤێ منێ ژ ناسنامەیا من وەریای
ئەز یێ ل ناڤێ خۆ بەرزەبوویم
ئەگەر سپنەی ناڤێ یارێ خۆ زانیبا
بێی دودلی
دا هاری من، ل من گەڕیت
رۆندکێن شێلی نە دبوون خێلی
داجارەکێ ل گەڕاڤکێن سپنەی ڤەگەڕیت
ما کی دشێتن ئەوان سالان بهەژمێریتن
هەکو سپنە کچەکا جوان و گارەیێ هشک ژڤان ددانێ؟
لەو هەژاری ئاتافەکە و هەژار کرمێن پێلێنانێ
دەروێشێن ژار دەفک لێدا
قەشا و مەلان زەنگل لێدا
بانگ هەلدێران
نڤشتی بەردان ب ئاڤێ دا
ئو هەر گارە هشیار نەبوو، ما بەنجکری،
ما د خەوێ دا
ئەگەر گارە هشیار ببا
دا ئەو کەڤرێ ژ دلۆڤانیێ ڤالاکری
بنە هری
دا دندکێن هەلهەلۆکان ب لێڤێن یارا خۆ وەرکەتن
دا هاویش کەت، نە دکر گری
ئەگەر گارە ب پییان چووبا
دا بەلی بیت
جوانترین سێڤ د هەبوونێ دا مەمکێن تەنە
رتما شعرا من شاش کری
وەلێ گارە نەخشێ تۆڕبێن کاروانیانە یێ تژی خەم
ل دۆرێن وی
چاڤێن کوردان
فندێن شەڤێن خەنایێ نە خۆ کریە چەم
لەو شعرا من یا بێ رتمە، یا مایە کەم
ل ژڤانێ تە ئەز نە ئەزم
ئەز بەفرەکا بوهژی مە و بێ ناسنامە
ئەز هەلمەکم
من دخۆتن دەم
٥\١١\٢٠٢٤
