مرۆڤێ ئاسایی هەست ب لێدانێن دلی ناکەت
د. مەجید حسێن دۆسكی، تایبه‌تمه‌ندێ نه‌خۆشیێن دل و هناڤا و قه‌سته‌را دلی دیاركر كو دلقوتك ئه‌وه ده‌مێ لێدانێن دلی زێده‌دبن، چونكو مرۆڤێ ئاسایی ب لێدانێن دلێ خو ناحه‌سیێت، كێمبوونا لێدانێن دلی ئه‌وه كو لێدانا وی بهێته د بن 50ێ دا، پتریا جاران مرۆڤ هه‌ست ب لێدانا دلی ناكه‌ت، گێژبوون و بێهێزی دێ ل ده‌ف په‌یدابن و دێ دیاربیت دلقوتانا وی یا كێمه و گۆت: ئه‌ڤ هه‌ردو حاله‌ته ب مه‌ترسینه هه‌كه نه‌هاتنه چاره‌سه‌ركرن، چونكو هه‌كه لێدانێن دلی كێمبوون و نه‌هاته چاره‌سه‌ركرن، دبیت دلێ وی ب راوه‌ستیت و ژ كاربكه‌ڤیت و دبیت پێدڤی ب دانانا پاتریا دلی ببیت و هه‌كه زێده هاته لێدان و گه‌هشته سه‌دێ و د سه‌دا و مرۆڤی چاره‌سه‌رنه‌كر، دبیت ئه‌ڤه‌ژی ببیته ئه‌گه‌رێ وێ چه‌ندێ نه‌خۆش تووشیه لاوازبوونا دلی ببیت.
د. مەجید حسێن دیاركر كو ئه‌گه‌رێن زێده‌لێدانا دلی گه‌له‌كن، یێن هه‌ی په‌یوه‌ندی یا ب دلیڤه هه‌ی و یێن هه‌ین ژده‌رڤه‌ی دلی ژی، یێن گرێدای دلی بۆ نموونه هه‌ر ئێشه‌كا دلی هه‌بیت، وه‌كو ته‌نكبوونا ده‌مارێن دلی، صه‌مامێن دلی هه‌كه هاتنه‌گرتن یان به‌رفره‌ه ببن، یان هه‌كه نه‌خۆش تووشی جه‌لته‌كا دلی ببیت و نه‌خۆشیێن دلی یێن زكماكی و دیسا زێده‌بوونا كاره‌با دلی كو هه‌می دبنه ئه‌گه‌ر نه‌خۆش هه‌ست پێ بكه‌ت دلێ وی زێده لێدده‌ت.
ده‌رباره‌ی ئه‌گه‌رێن ده‌رڤه‌ی دلی ژی گۆت: وه‌كو غودا ژه‌هراوی یان هه‌كه خوینا نه‌خۆشی كێمبوو دیسا ژنێن دوگیان و هه‌كه نه‌خۆش تووشی هه‌ر جوره‌كێ تایه‌كێ ببیت دبیته ئه‌گه‌ر لێدانێن دلی زێده‌ببن.
هه‌روه‌سا دیاركر كو نیشانا سه‌ره‌كی یا په‌یدابوونا ڤان حاله‌تا ئه‌وه كو نه‌خۆش دێ زانیت دلێ وی یێ لێدده‌ت، ئه‌ڤجا چ لێدان یا به‌رده‌وام بیت یان هه‌ست ب گرتنا سینگی بكه‌ت یان تشته‌ك حه‌فكا وی بگریت و به‌رده‌ت، یانژی هه‌ست ب گێژبوونێ بكه‌ت هه‌می نیشانن كو لێدانێن دلی د سرۆشتی نینن و گۆت: دبیت هنده‌ك جارا ژ ئه‌گه‌رێ ئاخفتنه‌كێ یان ترسه‌كێ یان دودلیه‌كێ تووشی زێده‌لێدانا دلی ببیتن، به‌لێ ده‌مێ نه‌خۆش هه‌ستپێ دكه‌ت، یا باش ئه‌وه دووڤچوون بهێته‌كرن و بزانین كا لێدان ژ دلی یلن ده‌رڤه‌ی دلی یه و بشێن زوی چاره‌سه‌ربكه‌ین.
هه‌روه‌سا دیاركر كو گه‌له‌ك جورێن زێده‌لێدانا دلی هه‌نه، هه‌كه گرێدای نه‌خۆشیه‌كێ بیت دێ چاره‌سه‌ریا وی هێته‌كرن و گۆت: دبیت ژی گه‌له‌ك جاران ئه‌و كه‌س چایا ره‌ش قه‌هوێ گه‌له‌ك ڤه‌دخۆت یان جگارا گه‌له‌ك دكێشیت و هه‌كه گه‌له‌ك نه‌خۆشیا خۆ ژێ نه‌بینیت پێدڤی ب چاره‌سه‌ریێ ژی نینه.
ل دۆر رێكێن چاره‌سه‌ریێ ژی گۆت: ب دو شێوا چاره‌سه‌ری دهێته‌كرن، یا ئێكێ هه‌كه نه‌خۆشیه‌ك هه‌بیت ئه‌م دێ چاره‌رسه‌ریا وێ كه‌ین، یا دوێ هه‌كه یا نورمال بیت و چ نه‌خۆشیێن ده‌ستیشانكری نه‌بن و گه‌له‌ك چاره‌سه‌ری وه‌رگرتن و مفا نه‌بوو، ، ئه‌م كه‌ویێ یان لێزه‌رێ بۆ كه‌ین و گه‌له‌ك جارا پێدڤی ب كارئینانا ئامیر ات دبن هه‌تا دزڤرنه ره‌وشا خو یا سرۆشتی.
