مرۆڤ
…
د. عارف حیتۆ
هه‌كو هیڤی ژ چیمه‌نا دلی بار دكه‌ت،
ژڤانان دئێخته گۆمانێ
هه‌كو خه‌ون كیفكویی دبیت،
بێ رامانه شه‌هوه‌ت و جانێ بارانێ
هه‌كو جوانی ل بیره‌هییان خائین دبیت
ستێره‌ك ژ بانێ حه‌زێ دكه‌ڤیت و دقه‌شیێته
نێڤ كۆلانێ!…
*
ئه‌ز مرهۆڤه‌ك تشابه‌تم د ژۆرا خوه ڤه
نه نامه‌یێن كه‌سێ دخوینم
نه نامه‌یێن گریمانكی،
ژبۆ كه‌سێن ل پشت ده‌ریایێ دهنێرم
هه‌ستێن من رستكه‌كا مۆریكان بوو
هه‌ر ژ وێ رۆژا من خۆدیكا خوه شكاندی
ڕستكا هه‌ستێن من ژی قه‌تیا و
هه‌ست كت كته ب ژۆرێ وه‌ربوون
ته‌ڤ پێكۆلێن من یێن ڤه‌كرنا په‌نجه‌ره‌یێ،
بێزه‌ڤه‌ر بوون
ئه‌و بلبلێن ل به‌ندا من ژی، فڕین و چوون
جیهانا من یا بچووك دبیت
ب تنێ ئه‌ز و خه‌م و ڕۆندك
بێلایێن كه‌سك دنژینین و دهه‌ڕێفین
ئه‌وان هه‌ستێن بژاله بووین، دئاخێڤین
ته‌ناهییا وان هوورهووركێن…
ژ ژین و سه‌ربۆرێ ڤه‌بووین، دێ كه‌رێفین
وێنێ من یێ ب دیواری ڤه
ئاڤیڤانه‌ك دێم به‌هتی و خه‌ون ژێ كه‌فتی
قافكه‌ك گولان من تێ وه‌ركر
نامه‌یه‌كا چاڤان تیپێن وێ ڤه‌خواری و
هندی من یا هه‌مبێزكری، یا په‌ڕتی
من دانا بن شه‌مالكه‌كا بۆ من دگریت
هه‌ر سۆراڤ و سپییاڤه‌كا ژ سالان ڤه‌ماین
هه‌ر بازن و گڕدانه‌یێن د پاتان را ماین
من دگه‌ل گلێشی هاڤێتن…
هه‌ر ئه‌ته‌ك و بنكراسكێن ژ خوینێ زاین
كرنه گولمچك، ل بن دۆشه‌كا خوه ڤه‌شارتن
ئه‌ڤان تشتێن ئه‌ز ژێ تووڕه
سه‌رده‌مه‌كی ب دیتنا من ڤه صۆپه بوون
ب خه‌ونان ڤه.. شرۆڤه بوون
ئه‌ز و ئه‌ڤ كورسیكا ڤالا، ژ ئه‌زه‌ل دا هه‌ڤالبه‌ندین
ئه‌و دئاخڤیت و ئه‌زا بێده‌نگ
ئه‌ز دئاخڤم و ئه‌وا بێده‌نگ
ب ڤان هه‌ستێن بریندار و بژاله بووین،
به‌ستی و به‌ندین
هه‌كو سپێدێ،
پیره دایكا من ده‌رگه‌هی ب نیڤی ڤه‌دكه‌ت
ل سه‌ر مێزا من دهێلیت،
كێكه‌كا گه‌رم و چكلێته‌كا ماكنتۆش
برینه‌كا سارێژ نه‌بووی ل ناڤ نزایێن ڤالا و بۆش
هه‌می تشت ژ چاڤان دبارن، ژبلی یێن خۆش
و زڕینا گوهدرێژێ ل پشت ده‌رگه‌هی
سترانه‌كا نه‌ستراندی ل سه‌ر شاشه‌یان
كه‌سه‌ك نه‌وێریت بێژتێ شوووووش!
***
