مریشكێن شێرپـەنـجێ
مستەفا عەبدورحمان ئەرەدنی
د بەرنامەیێ «لە گەل رەنج» كەنالێ رووداو، مەترسیەكا هەرە مەزن یا ل سەر ساخلەمیا مرۆڤی هاتە ئاشكراكرن، ئەم هەمی تووشی گوهشینێ كرین، بەحسێ فاكسینەكا قەدەغەكریا جیهانی بناڤێ (فیورال تادۆن) هاتەكرن كو بۆ مریشك و پەلەوەران دهێتە دانان و دبیتە سەدەما پەیدابوونا پەنجەشێری ل دەف مرۆڤی و ئەڤە پتر ژ چل سالانە ئەو دەرمان ل وەلاتێ ئەمریكا و ئورۆپا و ل سەر ئاستێ جیهانێ هەمیێ هاتیە قەدەغەكرن، بەلێ ب ساناهی دهێتە كوردستانێ!.
گەلەك جاران من وەكو كەسەكێ ئاسایی و د گەلەك رۆنشتنان دا دگۆت: بەلاڤبوونا نەخۆشییا پەنچەشێرێ ب ڤی رەنگێ بەربەلاڤ نەتشتەكێ سروشتی و ئاساییە)!، چونكو ل بیرا منە ل سالێن هەشتییان ل دەڤەرا مە یا سەرسنكێ و دەوروبەران بتنێ ئێك یان دو ژن هەبوون؛ تووشی نەخۆشیا پەنجەشێرا مەمكی ببوون، ئەڤرۆكە ل سەرسنكێ دبیت پتری 50 كەسان تووشی وێ نەخۆشیێ ببن و ب دەهان كەس مرینە، من هەر دگۆت: ئەڤە پەنچەشێرە بۆ مە دهێتە هنارتن د ناڤ كەرستەیەكێ خوارنێ دا، لەوما وەكو چاوان ئاگری بەردەینە پیشی و ئاگری ڤێهەل دچیت، ئها وەسا ئێشا پەنچەشێری ب ناڤ مەدا دچیت و بەلاڤدبیت و نوكە ب هزاران خەلك تووشی ڤێ ئێشا گران بوویە، ل گەلەك جاران مە دگۆت: پێدڤییە لژنێن نۆشداری و پشكنینێ بهێن پێكئینان بۆ دیاركرنا ئەنجامێ بەلاڤبوونا ڤێ نەخۆشیا كۆژەك، بەلێ كەسێ چ ب گۆتنێن مە نەدان.
ئەڤرۆكە باوەرم ئەڤ نەخۆشیا كوژەك د ناڤ مەدا وەكو نەخۆشیا فشارا خوینێ و شەكرێ و ئێشێن دیتر لێهاتیە و بووینە ئاسایی، هەر چەندە ئەز باوەرم هۆكارێن بەلاڤبوونا ئێشا شەكرێ ژی ب ڤی رەنگێ بەربەلاڤ؛ هەر جۆرەكێ مادەكی یە بۆ مە د ناڤ خوارنێ دا دهێتە هنارتن، ڤێجا هەتا ئەو ژی جوامێرەك ئاشكرا دكەت.
بەرنامەیێ «لە گەل رەنج» رووداو، ئەڤرۆ پەردە ل سەر نهێنیەكا مەزن یا هۆكارێن بەلاڤبوونا پەنچەشێرێ راكر كو ئێك ژ هۆكارێن بەلاڤبوونا وێ ئەو فاكسنیە یا بۆ مریشكان دهێتەدانان، (ماشەللا) ژی چ مال نینن رۆژانە مریشكێ نەخۆن، چونكو ئەم كورد گەلەك دزكینین.
ئەرێ بتنێ مریشك و فاكسین سەدەمن كو ب ڤێ رێژەیا مەزن خەلك تووشی پەنچەشێرێ كری یان هێژ هندەك كەرەستەیێن دیتر ژی ماینە هێژ نەهاتینە ئاشكراكرن؟.
ب دیتنا من هێژ كەرستێن دیتر ژی ماینە و دبیت جوامێرەكێ دی یێ وەكو رەنجی وان ژی ئاشكرا بكەت.
هزر دكەم ئەڤ بابەتە یێ پلانكریە و چ ژلایێ وەلاتێن هەرێمی یان ژی لایەنەكێ دیترڤە پلان بۆ هاتیەدانان و دبیت هەردو مەبەستێن (سیاسی و بازرگانی) ژی ل پشت وێ پلانێ هەبن، چونكو ئەگەر هۆسا بچیت ب چەند سالەكێ، دیتر نیڤەكا خەلكێ كوردستانێ دێ بنە هەلگرێن نەخۆشیا پەنجەشێرێ و ئەڤە دەلیڤەكا باشە هەر بۆ ژناڤبرنا تاكێن كورد و كێمكرنا وان و د هەمان دەم دا بۆ بازرگانێن داڤ و دەرمانێن پەنچەشێرێ ژی كو دێ پتر دەرمانێن وان هێنە مەزاختن و گۆژمەكێ پارەی یێ مەزن دێ چیتە د بەرێكێن وان دا.
یا دیتر ل دەمێ رەنجی دیدار ل گەل دكتۆرەكێ فێتەرنەری كری یێ ئەو دەرمان دفرۆتە خۆدانێن پرۆژەیێن پەلەوەران دكتۆر دەركەفتن ب رەگەز (عەرەب) و ئێك ژ فرۆشیارێن ڤی دەرمانییە و گۆت خۆدانێ كۆمپانیێ ب خۆ پەیوەندی ب كۆمپانیایەكا چینی كری و داخواز ژێ كریە، قۆدیكا وی دەرمانێ قەدەغەكری بگۆرن و ب ناڤەكێ دیتر هەمان دەرمان رەوانەی بكەن, ئەڤە پتر گومانێ دئێخیتە ل سەر بابەتی كو ئەڤە چەندە یا پلانكریە ژ لایێ لایەنەكێ تایبەت ڤە، ب راستی ئەڤە بێ وژدانیەكا مەزنە، ل گەل خەلكێ مە هاتیەكرن، لەوما فەرە دكتۆر و خۆدانێن كۆمپانیان و هەر كەسەكێ دەست د ڤێ تاوانێ دا هەی بهێنە سێدارەدان، چونكو ئەو بووینە سەدەمێ گیانستاندنا سەدان كەسان ل كوردستانێ.
هەر وەسا پێدڤیە لژنەكا بالا و خۆسەر و تایبەتمەند د پشكنینان دا ژ لایێ سەرۆك وەزیران «مەسرور بارزانی» بهێتە پێكئینان، دویڤچوونا ڤی بابەتی بكەت و هەروەسا هەمی كەرستێن (خوارنێ و كشت و كالی) یێن دهێنە د ناڤ كوردستانێدا بهێنە پشكنینكرن، داكو رێك ل ڤان جۆرە تاوانان بهێتەگرتن و دیسا ئەو لژنا نۆژداران ل دەروزاێن سنووری و ئەو دەرمان تێرا دەربازبووی؛ بهێن گرتن و ڤەكۆلین د گەلدا بهێتەكرن، چونكو گوهۆرینا قۆدیكێ و ناڤێ وێ نابیتە بهانە ئەو نەزانن كو ئەڤ دەرمانە كۆژەكە. ب فەر دزانم پەرلەمانێ كوردستانێ یاسایەكێ دەر بكەت كو تێدا هەر كەسێ ب ڤان جۆرە تاوانان راببیت؛ چ كۆمپانیا و چ خۆدانێن وان و چ دكتۆر وچ فرۆشیار بیت ب توندترین سزا بهێنە سزادان و تاوانبارێن سەرەكی بهێن سێدارەدان داكو ئێدی كەس وێرەكێ نەدەتە خۆ ڤان جۆرە تاوانان ل هەنبەری هەڤوەلاتیێ كوردێ كوردستانیان دا بكەت.
