مزگينيه‌كا خۆش ل دۆر كاره‌با نشتيمانى
ئه‌ڤرۆ نيوز:
پەیڤدارێ وەزارەتا کارەبێ ل حوکمەتا ھەرێما کوردستانێ دیار کر کو د ھاڤینا ئەڤ سالە دا رەوشا کارەبا نیشتیمانی دێ ژ سالا بۆری باشتر بیت و دبێژیت: حوکمەت دێ غازا سروشتی بۆ وێستگەھێن بەرھەمئینانا کارەبێ دابین کەت.
محەمەد ئەمین ھەوارامانی، پەیڤدارێ وەزارەتا کارەبێ ل حوکمەتا ھەرێما کوردستانێ بۆ رۆژناما ئەڤرۆ گۆت: “وەزارەتا کارەبێ ھەر ژ نوکە پێڤە خوە بۆ وەرزێ ھاڤینێ بەرھەڤ دکەت و دەست ب چاکسازیێ د کەرتێ کارەبێ دا ھاتیەکرن، دھێتە چاڤەڕێکرن ئەڤێ چاکسازیێ کاریگەریێن خوە ل سەر باشبوونا رەوشا کارەبا نیشتیمانی ھەبیت، دیسا ھەوا بڕینا کارەبا زێدەگاڤی ھاتیە دەستپێکرن، د دەمێ نوکە دا رێژا بەرھەمئینانا کارەبێ ل یەکەیێن بەرھەمئینانێ 2700 مێگاواتن، ئەڤە د دەمەکی دایە د وەرزێ ھاڤینێ دا مە پێدڤیا ب 4500 مێگاواتێن کارەبێ ھەی، داکو بشێین پێدڤیێن کارەبێ تژی بکەین”.
ھەورامانی خویا ژی کر، ئەم یێ کار دکەین کو د وەرزێ ھاڤینێ دا کارەبا نیشتیمانی پتر ژ سالا بۆری بدەینە وەلاتیان، بەلێ مخابن ژ بەر بلندبوونا پلێن گەرمێ و بکارئینانا ئامیرێن تەزیکرنێ بارگرانیەکا زۆر د وەرزێ ھاڤینێ دا دکەڤیتە سەر تۆرێن کارەبا نشتیمانی و گۆت: “ئەم پێشبینی دکەین ئەڤ سالە رەوشا کارەبێ ژ سالا بۆری باشتر بیت، چونکو حوکمەت دێ غازا سروشتی بۆ وێستگەھێن بەرھەمئینانا کارەبێ دابین کەت”.
