مزگین دێ كلیپا خوه یا ئێكێ د ئه‌ڤ ساله دا به‌لاڤ كه‌ت
ئه‌ڤرۆ، زنار تۆڤی:
سترانبێژ مزگین رۆمی، ژ مالباته‌كا هونه‌ری ل باژێرێ كۆبانێ ل رۆژئاڤایێ كوردستانێ ژ دایك بوویه و بابێ وی هه‌لبه‌ستڤانه، پرانیا سترانێن وی ژ هه‌لبه‌ستێن بابێ وی ب خوه‌نه، د هه‌مان ده‌م دا بابێ وی و مامێ وی ئاوازان بۆ سترانێن وی ددانن و نوكه ل باژێرێ سلێمانییێ دژیت، د دیداره‌كێ دا بۆ رۆژناما ئه‌ڤرۆ دیار كر ده‌مێ ئه‌و ل كۆبانێ بابێ وی ستۆدیۆیه‌كا تۆماركرنا سترانان هه‌بوو، نوكه ژی وی ب خوه ستۆدیۆیه‌ك هه‌یه، سترانان تۆمار دكه‌ت و د هه‌مان ده‌م دا ئه‌و مامۆستایێ هونه‌ری یه و زارۆیان فێری نۆتێن مۆزیكێ دكه‌ت، هه‌روه‌سا وی ل گه‌ل چه‌ندین كۆمان كار كریه و چه‌ندین كلیپ و ستران ژی ل گه‌ل وان كۆمان چێكرینه.
ناڤهاتی ئه‌و ژی گۆت: هه‌تا نوكه وی سێ سترانێن سینگل تۆمار كرینه، لێ ژبه‌ر ده‌ست كورتیا بارێ ژیانێ هه‌تا نوكه وی چو كلیپ به‌لاڤ نه‌كرینه، هه‌روه‌سا ل ڤان رۆژێن بوری وی ل گه‌ل خانما سترانبێژ (لۆرینێ) ئه‌لبۆمه‌كا سترانان چێكریه، كو ئه‌ڤه پتری دو هه‌یڤانه ل ئه‌و مژوولی تۆماركرنا وێ ئه‌لبۆمێ نه و ب شێوێ دویت تۆمار كرینه، دیسان ئه‌و دچیته ئاهه‌نگ و دیلانێن كوردان و ئه‌و ئامیرێ عۆدێ و جۆمبشێ و سازێ دژه‌نیت، وی مۆزیك ل رۆژئاڤا و سلێمانیێ ژی خواندیه، د ژیێ 11 سالیێ دا هه‌تا نوكه د وارێ هونه‌ری دا كار دكه‌ت و نوكه د ژیێ 25 سالیێ دایه، دیسان وی پشكداری د چه‌ندین به‌رنامێن هونه‌ری دا كریه، نوكه ژی مژوولی چێكرنا كلیپا خوه یا ئێكێ یه و نوكه بۆ خوه ل سپۆنسه‌ران دگه‌ریت، ژ پێخه‌مه‌ت بشێت كارێن هونه‌ری یێن باش ئه‌نجام بده‌ت، هه‌روه‌سا ئه‌و گه‌له‌ك حه‌ز ژ سترانێن فولكلۆری ژی دكه‌ت.
